September 9, 2018 (Pathianni) hi Naupang Sunday School Inkhawmpui Ni a ni a, Presbyterian Kohhran hnuaia Bial leh Kohhran hrang hrangah Naupang Inkhawmpui hi hman a ni ang. Naupang Inkhawmpuiah hian Sunday School naupangte chu Pathian thu chang sawirualah te, hla sakah te, thu inchhang sawiah te inelna neih a ni ang a. Heng bakah hian naupangten item hrang hrang a remchan dan angin an nei bawk ang. A tirah chuan Naupang Inkhawmpui hi Missionary-te thahnemngaihna avanga neih tan a ni a. Kum 1931 khan Aizawl Tlangnuam Kohhranah neih a ni a, hei hi Naupang Inkhawmpui hmasa ber ni-a hriat a ni. Tunhma lam chuan Naupang Inkhawmpui hi Bial hrang hrangin an remchan hunah an nei mai thin a, tun hnai deuh atang khan Bial tinte an kalrual theih nan MSSU chuan Sunday School Zirlai Syllabus-ah Naupang leh Senior Inkhawmpui hun tur an ruahman tel ve ta a ni. Senior Department Inkhawmpui chu September 16 (Pathianni)-ah neih a ni ang. Kum 2017 Synod Inkhawmpui report-a a lan danin tun dinhmunah Sunday School 963 a awm a, hotute 4,494 an awm a, Zirtirtu 47,116 awmin zirlai 3,82,183 an awm a ni.