Mizoram Synod Choir chuan tun term (2018 -2020) thara an music video hmasa ber 'Vanram ropuiah' tih hla, an conductor Pu T. Laldintluanga phuah chu nizan (Sept.13, 2018) khan Synod Choir Cabin, Synod Conference Centre-ah Central KTP Leader Rev. Dr. K. Lallawmzualan Pathian hnenah a hlan. He Music Video Track hi Lal K. Sailo siam a ni a, video hi Asanga Dosel, Sihphir siam a ni. Pu T. Laldintluang chuan 'Vanram ropuiah' hla hi kum 2017-a phuah a nih thu sawiin, "Synod Choir hla zir turin mahni lamah harsatna neuh neuh nei chungin phur vak lo takin ka scooty-in ka tlan phei hnak hnak a; chutia ka kal lai chuan a hla thunawn tawp atana ka hman tak 'Hmangaih vanga ka Lal hmel hliam hnu kha, lawmna mittui far chungin ka kuangkuah ang' tih hi ka rilruah a lo lut nasa em em mai a. Ka rilruin ka sa phei nghal ta nghe nghe a ni" a ti a.

"Ka ngaihtuah phei zel a; he khawvelah hi chuan lawmna famkim a va awm lo tak em! Sualna vangin ka rum a, chhungkua vangin ka mangang fo va, natna te vangin ka hrehawm thin a, thihna vangin ka tap thin a, rawngbawlna kawngah pawh hian min tihnualtu ka va ngah thin em! Mahse, Vanram ka thlen hunah chuan phur takin Chhandamtun min lo hmuak ang a, lungngaih vang ni tawh lovin lawm avanga mittui far chungin Chhandamtu khi ka la tawk dawn a ni, tih hi Pathianin min rawn hriattir ka ti mai. Thlamuanna mak tak mai a lo thleng a, scooty khalh chung chuan a thluk nen ka rilruin ka sa a, ka mittui a far zung zung mai a ni" a ti a. Tichuan, “a thlûk leh a thu ka theihnghilh ka hlau a, hla zirna hmun ka thlen chuan a rukin ka record ta a. A tukah ka phuah zawm ta a ni," tiin he hla a phuah dan chanchin a sawi. Dina chuan, "Tunlai chhanah khawvelah nawmchenna tur hrang hrang a tam ta hle. Ringtu vanram ngai ngai lo a va awm theih dawn em! Kristiante vanneih bik em emna chu Vanram beisei tur kan nei hi a ni tih te ka ngaihtuah a. Chu hmunah chuan a rawng kan bawlsak Isua ngei hian min lo hmuak ang. Kan tan hmun siama kal a, a hnena kan awm theih nana lo kir a, lak min tiamtu thutiam hi innghahna tlak a ni," a ti. 'Vanram ropuiah' hla phuahtu Pu T. Laldintluanga hian hla a phuah nual tawh a, a hla phuah zingah 'Lal Isua hmangaihna' tih te, 'Min hruai thin' tihte chu sak hlawh tak niin, KTP General Conference Hla Bu-ah pawh dah a ni. [embed]https://youtu.be/wdrMq2t0lCI[/embed]