Kum 2007 atanga mumal taka Delhi khawpui khawthlang lama inkhawm thin 'Mizo Christian Fellowship' chuan Kohhran-a awm duhin 'Presbyterian Kohhran'-a luh an rel a. An duhna te Delhi Kohhran (DMPC)-ah thlenin, Delhi Kohhran hruaitute nen pawh tum engemawzat an inkawm a, an dinhmunte ngun taka zirchian a nih hnuah Synod Officers' Meeting (O.M) hnenah thlen a ni ta a. Synod O.M-in ngun taka a ngaihtuah hnuah Branch Church-a hawn rem tiin, September 16, 2018 (Pathianni) khan Delhi Mizo Presbyterian Church-West chu Delhi Pastor Bial vawngtu Pastor David Lalramliana Ralte-in a hawng ta a ni.
Kum 2005 daih tawh atang khan he Mizo Christian Fellowship (MCF) hi a lo inmung tawh a, Zo hnahthlak dang-Lai, Zomi leh Hmar te anga pawl din te pawh an rel a. An remchan dan angin Pathianni chawhnuah te an inkhawm ve tan a, kum 2007-ah hruaitute inthlangin, mumal takin an inkhawm chho ve ta a. Kohhran serh leh sang tih dawnin Mizoram Synod hnuaia mi, Delhi Mission Field Secretary leh Pastor remchangte an pun thin a. Mumal zawka Kohhran inrelbawlna hnuaia awm duhin an Annual General Body Meeting-in an Fellowship chu thiata Presbyterian Kohhran-a luh hi an rel ta a ni.
DMPC-West Kohhran (Branch Church)-ah hian member 170 vel awm tura chhût a ni a. Mizoram lam angin a huam tur chin sawi mai theih a ni lo va. Tuna inkhawm mekte bakah pawh a remchan dan angin hunin a la hril zel mai tura ngaih a ni. Mizoram leh hmundang atanga Delhi West lama Mizo rawn awm/pem reng reng ten an belh turin Delhi West Kohhran hi din a ni. Delhi Mizo Presbyterian Church Bial hnuaiah Kohhran puitling la ni chiah lo mah se, Kohhran pahnih Delhi Kohhran (DMPC) leh Delhi West Kohhran (DMPC-West) a awm ve dawn ta a ni.
DMPC-West Branch Church Hruaitute:
Chairman : Upa R.Lalropuia
V/Chairman : Pu Hrangauchhunga
Secretary : Pu F.Lalremruata
A/Secretary : Pu Lalchhûnga
Fin. Secretary : Pu Lalhminghlua
Treasurer Tualchhung : Pu Lalchhanchhuaha
Treasurer Synod sum : Pu C.Lawmkima
Bialtu Pastor David Lalramliana Ralte bâkah DMPC atangin Rev R.Lalrosiama Committee-ah hian a tel bawk.
