Vawiin (Sept. 27) khan District 5 – Lunglei, Serchhip, Champhai, Kolasib leh Mamit-ah te Kohhran Inpumkhatna leh thawhhona Seminar thawh hnihna chu neih a ni.
Seminar hi Zone 5 –ah then a ni a - Zone khatna hi Lunglei District, Lawngtlai leh Saiha District huam chhunga miten Lunglei Chanmari Kohhran Hall-ah an hmang a, Rev. R.C. Lalnghakliana, Administrative Secretary-in a kaihruaiin Synod Finance Officer Rev. H. Remthanga’n paper a chhiar a. Kal zat 149 an ni.
Zone hnihna hi Serchhip District huam chhunga miten Serchhip Kawnpui Kohhran Hall-ah an hmang a, Synod Moderator Rev. F. Lalrinnunga’n a kaihruai a, Rev. Dr. H. Vanlalaua’n paper a chhiar a. Kal tura beisei mi 200 an kal kim thei a ni.
Zone thumna hi Champhai District huam chhunga miten Champhai Vengthlang Kohhran Hall-ah an hmang a, Synod Statistician Rev. R. Lalnuntluanga'n kaihruaiin Rev. Dr. H. Lalrinthanga, Associate Professor, ATC-in paper a chhiar a. Kal zat 292 an ni.
Zone li-na hi Kolasib Diakkawn Kohhran Hall-ah an hmang a, Rev. PC Pachhunga, Executive Secretary-in kaihruaiin Rev. Vanlalrova Khiangte, Principal, MTC-in paper a chhiar a. Kal zat 185 an ni.
Zone nga-na hi Mamit Kohhran Hall-ah an hmang a, Upa R. Dengzikpuia, Synod Secretary-in kaihruaiin Rev. Dr. B. Lalnunzira, Associate Professor, ATC-in paper a chhiar a. Seminar-a kal zat 204 an ni.
Seminar-ah hian Kohhran tin aiawha kal tura ruat Pastor, Pro. Pastor leh Minister te an kal tha hlawm hle a. Sawihona hun tha tak neih a ni bawk.