Central KTP chuan Aizawl khawpui chhunga KTP member-te tan Oct. 6, 2018 (Inrinni) chawhma dar 11:00 hian tawngtai rual a buatsaih dawn a, thupui hrang hrang hmangin tawngtai rualna neih a ni ang. KTP General Conference West Phailenga neihah khan ram pum huapin Member hlate pual, ruihhlo ngaite pual, sual thupha chawina leh MLA General Election lo awm tur atan tawngtai rual neih ni se, tia rel a ni a. CKTP chuan hei hi bawhzuiin, Mizoram hmun hrang hrangah Branch hrang hrangten August 27 zan inkhawm banah tawngtai rualna hi an nei tawh a. A kharna atan tawngtai rual hi Aizawlah A.R. Lammualah buatsaih a ni ang. Tawngtai rual hi hun hniha then a ni ang a. Hun khatna hi Rev. Dr. K. Lallawmzuala, CKTP Leader-in a kaihruai ang a, Rev. F. Lalrinnunga, Synod Moderator-in thuchah a sawi ang. Hun hnihna chu Upa Rosangliana, CKTP Asst. Leader-in a kaihruai ang a, Rev. B. Sangthanga, Executive Secretary i/c Kristian Thalai Pawlin thuchah a sawi ang. Hun khatna leh hnihnaahte hian Synod Choir an zai ang. A.R. Lammuala tawngtai rual neih a nih rual hian District Capital-ah te pawh tawngtai rual hi hman tur a ni a. Lawngtlai-ah Lawngtlai Bial leh Lawngtlai Chanmari Bial-ten an huaihawt ang a, Lungleiah Lunglei Bazar Bial leh Lunglei Chanmari ten an huaihawt thung ang. Serchhipah chuan Chhimchhak Presbytery huapin Leisekawt Field-ah hun hman a ni ang a, Kolasib chuan Kolasib Venglai Kohhran Biak Inah an hmang thung ang. Saiha Bialin Saiha Kohhran Hall-ah hun an hmang ang a, Champhaiah chuan Champhai Kahrawt Field-ah tawngtai rualna an nei ang. Mamitah pawh Mamit Bial leh Mamit Hmunsâm Bial hmalaknain tawngtai rual programme hi hman a ni ang.