Vawiin (Oct. 18, 2017) khan Pi Zaii Hall, Synod Conference Centre-ah Presbyterian Kohhrana Pastor leh Pro. Pastor nupui Intawhkhawm vawi 40-na neih a ni. Chawhma hun hi dar 10:00-ah tan a ni a, Pi P.C. Rawnkaii w/o Rev. F. Lalrinnunga, Synod Moderator in a kaihruai a, Pi Saithangpuii w/o Rev. C. Satliana, Ramhlun Sport Complex-in hunserh a hmang. Pi Lalroluahi w/o Rev. Lalramliana Pachuau, Senior Executive Secretary-in thupuanna hun hmangin inhmelhriattirna hun a hmang a, Sunna hun hman a ni bawk. Aizawl Theological College (ATC) a Pastor nupuite zaipawl ngaihthlak a ni. “Fanau enkawl leh Incheina” tih Pi B. Lalthlamuani w/o Rev. C. Rosiama, Mission Veng ziah leh “Pastor Nupui leh a nihna” tih Pi C. Januari w/o Rev. Dr. Vanlalthlana (L), Ramhlun ziah te zirho a ni. Chawhnu lam hun chu dar 1:00-ah tan a ni a, Pi Lalroluahi w/o Rev. Lalramliana Pachuau, Senior Executive Secretary in a kaihruai a. Pi C. Lalneihkimi w/o Rev. C. Ronghinga, Zarkawt in hunserh a hmang leh a, Pi Lalrammawii w/o Rev. Zosangliana Fanai, Synod Office zai ngaihthlak a ni a, item hrang hrang - Recitaion, Special item, Group zai, Debate leh Extempore speech hmangin intihhlimna hun an hmang a, zanriah an kilho nghal a ni. Presbyterian Kohhran Pastor Nupuite hian kum tin intawhkhawmna hun an hmang thin a, mithiamte ruaiin thuchah ngaihthlak bakah thupui thlan bik paper te an zirho thin a, an pasalte rawngbawlna an tawiawm theih dan tur leh Kohhran tana Nu nih tling an nih theihna tura theih tawpa hma la tura infuihna hun te hman a ni bawk thin.