October 21, 2018 (Pathianni) zan inkhawmah NEICC puala tawngtai rualna hun hman tur a ni a, NEICC pualin thawhlawm lakkhawm a ni ang. Kum 1937 khan Assam Christian Council din a ni a, kum 1962-ah North East India Christian Council (NEICC) tiin a hming thlak a ni a. NEICC hnuaiah hian NEICC Youth Assembly (NEICCYA) leh NEICC Women Assembly (NEICCWA) te, hruaitu hrang neiin an awm a; anmahni pualin mawhphurhna leh hmachhawp an nei bawk.
Kum 1952 khan NEICC hian a hmalakna langsar tak, Union Christian College (UCC) chu bul a tan a; tunah hian UCC-ah hian Arts, Science leh Commerce zirlai mi 800 chuang an awm a. College hi mipa leh hmeichhe luh theihna (co-educational) a ni a, zirlai eng emaw zat tan hostel a awm bawk. Kum 2016 khan NEICC chuan hma thar lain, UCC campus chhungah chuan UCC Higher Secondary School a din leh a. Nursery atanga Class XII zirlai hi an vaiin mi 283 an ni a; Higher Secondary-ah hian Arts, Science leh Commerce zirna a awm. NEICC a din chhan hi – India hmarchhaka kohhran hrang hrang zingah inpumkhatna a awm theih nana hma la tur te, Sawrkar leh Kohhran inkara palai hna thawk tur te leh, hnam hrang hrang inkarah remna leh inhriatthiamna a awm theih nana hma la turtein a ni a. A din chhan ang ngeiin, kohhran inpumkhatna chungchang zir hona leh inrawnkhawmna te a huaihawt thin a; India hmarchhak nghawng tham thu pawimawh tak tak pawh a ngaihtuah thin.
Kum 2018-2020 chhunga Council hruaitute chu heng mite hi an ni:
President : Rev. Dr. Kathozelhou Keyho, Nagaland Baptist Church Council
Vice President : Rev. Dr. Laiu Fachhai, Evangelical Church of Maraland, Mizoram & Rev. H.L. Marsing, Ri-Bhoi Presbyterian Church Synod, Meghalaya
Secretary (full-time) : Rev. Dr. Ramengliana, Manipur Presbyterian Church Synod
Treasurer : Rev. Dr. Brightstar Syiemlieh, KJP Synod Sepngi, Meghalaya
te an ni.
NEICC puala Tawngtai thupui tur chu:
1. Pathian leh kan mihringpuite leh thilsiam dangte nen inremna kan neih theih nan.
2. Kohhrante kan awmna khawtlangah inremna thu puangtu kan nih theih nan.
3. NEICC hruaitute, NEICC Youth Assembly hruaitute, NEICC Women Assembly hruaitute leh NEICC office-a thawkte.
4. NEICC-a tel kohhrante Pathian ram tana kan thawh ho zel theih nan leh inpumkhatna kan neih zel theih nan.
5. NEICC hma lakna – Union Christian College leh UCC Higher Secondary School te tan.