Synod Inkhawmpui atana Synod Department hrang hrangte inruahman lawkna Committee chu October 22, 2018 (Thawhtanni) atang khan neih tan a ni. Oct. 22, 2018 (Thawhtanni) khan Pension Provident Fund Board committee an thu a, Meeting hi Rev. F. Lalrinnunga, Synod Moderator-in a kaihruai a, Meeting-ah hian Secretary report leh Treasurer report te ngaihthlak a nih hnuah Synod inkhawmpuia report tur, Secretary-in a buatsaih te ngaihthlaka sawiho a ni a, Synod Pension and Provident Fund Board Budget 2019 - 2020 ruahmanna pawm a ni bawk. Oct. 23, 2018 (Thawhlehni) khan PRESCOM Board an thu a. Oct. 24, 2018 (Nilaini) khan Sunday School Committee an thu leh a, Meeting hi Rev. F. Lalrinnunga, Synod Moderator-in a kaihruai a, Secretary hnen atangin report ngaihthlak a ni bawk. Secretary report-a tarlan danin kumin chhung hian Bial huap training vawi 28 an nei tawh a, Kohhran malah vawi 33 an nei tawh bawk a, heng training neihpui hian MSSU Office thawktute leh MSSU Trainer te an kalchhuak thin a ni. Kumin chhungin lehkhabu - Sunday School Zirlai bu hrang hrang leh a dangte nen bu 18 lai tihchhuah a ni. Kumin chhung hian Sunday School hotute, zirtirtute leh zirlai zawng zawng belh khawm hi mi 4,42,027 an ni a, Sunday School chawimawina chi hrang hrang siam tan kum 1967 atanga kumin thlenga chawimawina dawng tawh zawng zawng hi mi 47,301 lai an tling tawh bawk. Kumin hian Khawvel Sunday School Ni-ah Puitling lamin “Billy Graham-a chanchin” Upa Dr. H. Vanlalhluna ziak zir ho tur a ni ang a, Naupang lamah “Ngaihhlut tur dik” Dr. A. Lalchhandami ziak zirho a ni bawk ang. Tuntum meetingah hian MSSU inkhaihhruaina enthat chungchang te, NPSS Lesson Plan chungchang te, kum 2019-20 Budget estimate te an thlirho a ni. Oct. 25 & 26, 2018 hian Mission Board Committee an thu ang a, October 29, 2018 (Thawhtanni)-ah Theological Education Board, October 30, 2018 (Thawhlehni)-ah Hospital Board, October 31, 2018 (Nilaini)-ah Pastoral Committee te an thu leh ang.