October 26-28, 2018 chhung hian Presbyterian Women Fellowship Biennial inkhawmpui chu Mawlyngkhung Presbyterian Biak In (Ri Bhoi Synod), Meghalaya-ah neih a ni dawn a, thupui atan “In thawhrimna chu Lalpaah chuan a thlawn ngai lo” (I Kor.15:58) tih an hmang a, Speaker chu Prof. T. Vanlaltlani, Aizawl Theological College a ni ang. Vawiin (October 25) khan PWF Inkhawmpui hmang tur Central Kohhran Hmeichhe Committee te leh Palai dang mi 140 te chu Synod Office atangin a huhovin an chhuak a, Silchar-ah riakin a tukah Inkhawmpuina hmun Mawlyngkhung an thleng ang. October 26 (Ningani) zanah Inkhawmpui hawnna neih a ni ang a, palai lawmna thu Rev. R.K. Marshing, Executive Secretary, Ri Bhoi Synod-in a sawi ang. October 27 (Inrinni) nilengin rorel a ni ang a, zanah Inkhawmpui thupui Prof. T. Vanlaltlanin a sawi ang a, Mizoram Synod atanga palai zaipawl ten hla an rem bawk ang. October 28 (Pathianni) zing dar 7:00 hian Ri Bhoi Synod Moderator Rev. H.L. Mysing-an Lalpa zanriah sakramen a theh ang a, zan dar 6:30-ah Inkhawmpui kharna Closing Service neih a ni ang a, Rev. Lalramliana Pachuau, PCI Moderator-in PWF hruaitu thlan tharte hlanin thuchah a sawi ang.