Vawiin (Nov. 1, 2018) khan Pachhunga University College Mizo Department leh Zairema Memorial Society (ZMS) tangkawp chuan Rev. Dr. Zairema kutchhuak zirchianna, ‘National Seminar on Reconnecting Rev. Dr. Zairema : An Indepth Study of his Theological and Prose Writings’ tih chu Pachhunga University College Seminar Hall-ah an buatsaih.
He seminar-ah hian khuallian, Rev. Lalramliana Pachuau, Sr. Executive Secretary, Mizoram Synod chuan, Rev. Dr. Zairema chu Mizo hnam tana mi tangkai, hriatreng hlawh tur leh miropui a nih thu a sawi a. A chanchin leh a kutchhuak zirchian a ni ta chu theology leh secular lamah thil tangkai tak tur a nih thu leh Rev. Dr. Zairema chu a hunlai hnam mil ang zela Pathian thu kalpui thiammi a nih thu a sawi bawk.
Hunserh hmangtu Revd Chuauthuama, Zairema Memorial Society Secretary chuan, Rev. Dr. Zairema chu zirchian tham leh kutchhuak ropui tak tak nei a nih thu sawiin, “Zairema dam reng rawh se’ tiin a sawi. Keynote Speaker, Prof. Margaret L.Pachuau, Head, Department of English, Mizoram University chuan Zairema kutchhuak zirchiangin, politics lama a ngaihdan te ngaihnawm takin a sawi a. Pachhunga University College Principal, Dr. Tawnenga chuan, Rev. Dr. Zairema chu Mizo zingah a dam reng dawn a, a kutchhuak pawh zirchian a, degree ropui tak tak lak nan thangtharten an la hman zel a beisei thu a sawi bawk a ni.
Seminar Coordinator, Enid H.Lalrammuani, Head. Department of Mizo, Pachhunga University College chuan he seminar-ah hian paper ziaktu 50 chuang an awm thu a sawi a. Chung zingah chuan Theology lam ziaktu mi 14 lai an awm thu a sawi.
He seminar-ah hian Theology lama mithiam hrang hrang - United Theological College, Bangalore; Senate of Serampore College (University), Kolkatta; Eastern Theological College, Jorhat, Assam; Aizawl Theological College (ATC) leh Academy of Integrated Christian Studies (AICS)-a professor leh mithiam dang ten paper an present a. Rev. Dr. Zairema secular writing lamah Jawaharlal Nehru University (JNU) atang te, Mizoram University leh Mizoram chhung leh pawn College hrang hranga mithiam ten paper an present dawn bawk.
He seminar hi naktuk (November 2, 2018) hian chhunzawm a ni leh dawn a. A nihnihnaah hian Rev. Dr. Lalrinthanga, Executive Secretary, Baptist Church of Mizoram chu khualzahawm a ni ang a, mithiam hrang hrang ten paper an present leh ang.
He seminar-ah hian Pachhunga University College Mizo Department-in National Seminar an buatsaiha paper hrang hrang an dahkhawmna lehkhabu ‘Nuchhungi leh Naupang Literature (Understanding Children’s Literature of Nuchhungi Renthlei : Approaches and Systems) chu khuallian Rev. Lalramliana Pachuau hian a tlangzarh bawk. Seminar hawnna inkhawm hi Dr. Zoramdinthara, Asst. Coordinator chuan kaihruaiin, H.Laldinmawia, Asst. Coordinator chuan lawmthu sawiin hun hnung a chang a. Seeminar chhimtu mi 150 chuang zet an ni bawk.