Presbyterian Bible School chuan nimin (Nov. 26, 2018) chawhnu dar 1:00 khan Batch 44-na pualin Farewell and Dedication Programme Pi Zaii Hall, Synod Conference Centre-ah an hmang. Programme hi Rev. B. Sangthanga, Executive Secretary in a kaihruai a, Bible chhiar leh tawngtaina te a hman zawhin Rev. Vanlalngeiha, PBS Zirtirtu-in inlawmna leh inhmelhriattirna hun a hmang a. PBS Principal Rev. Lalneihvura’n report a pe. PBS Board Member Upa T. Vanlawma’n zirchhuakte hnenah certificate a hlan a, Nl. F. Lalzamliani leh 44th Batch PBS Choir ten Pathian fakna hla an sa bawk. Rev. B. Sangthanga’n zirlaite hlanna neiin thuchah a sawi a, zirlai titha te leh class kal kimte hnenah PBS Board Member Upa C. Lalzawnga’n lawmman a hlan a, Pu C. Awithanga Award pawh Pu C. Awithanga chhungten hlanna an nei bawk. Upa C.B. Thangluta, PBS Board Member-in zirlaite tana tawngtaisakna a nei a. Zirlai aiawhin K. Lalnunhlima’n thu a sawi a, Rev. K. Lalhmuchhuaka, PBS Zirtirtuin lawmthu sawina hun a hmang a, Chairman-in malsawmnain programme a khar a ni. PBS-ah hian a din tirh atangin tun thleng hian zirlai 2154 an awm tawh a, chung zinga 1828 ten tha takin an passed a ni. Tuna batch 44-naah hian zirlai 60 an awm a, 57 ten tha takin an pass a, exam lo 2 leh fail 1 an awm a ni. Exam-a titha zual pathumna thlengin lawmman Rs.1000/-, Rs.700/-, Rs.500/- leh Lawmpuina thuziak PBS Committee hminga hlan an ni a, chungte chu:- 1st - K. Lalnunhlima s/o K. Lalrawngbawla, Zemabawk Kohhran 2nd - F. Lalzamliani d/o F. Lalthangzuala, Ramhlun Venglai Kohhran 3rd - Vanlalhlana s/o Lalritluanga, Hualtu Kohhran Batch 44-na zirlai zingah hian class kal kim mi 20 lai an awm a, an hnenah lawmman Rs.500/- theuh hlan a ni. Kum 2014 atangin zirlai zinga Christian Theology leh Church Administration & PCI Constitution Subject-a titha ber hnenah Pu C. Awithanga Award hlan thin a ni a, award hian pawisa fai Rs.1,000/- a keng tel a ni. Tun tumah hian Vanlalmuanpuia s/o H. Laldawngliana, Khawhai South Kohhran chuan Christian Theology-ah 85% leh Church Administration & PCI Constitution-ah 95% hmuin titha ber nihna a hauh ve ve a ni. Presbyterian Bible School atanga zir chhuak tam berte hi rawngbawlna tangkai takah an in hmang zui thin a. Sunday School zirtirtu, Missionary, Social Worker hna thawkte an awm nual a. B.D. leh B.Miss. zawm pawh engemaw zat an awm tawh a ni. Synod Revival Speaker leh Team member tam zawkte hi Bible School atanga zir chhuak an ni bawk. Zir tluan chhuak thei lo te erawh hi chu Aizawla awmna tur mumal nei lo te, sawrkar hna an hmuh vangte leh hrisellohna avanga zir tluan thei ta lo te an ni.