Mizoram Synod, Family Guidance & Counselling Centre (FG&CC)-in Pastor-te puala November 14, 2018 atanga Synod Conference Centre-a Intensive Residential Pastoral Care & Counselling Training vawi 28-na a buatsaih chu November 26, 2018 (Thawhtan) zan khan ‘Final Evaluation & Graduation Service’ neiin khar a ni. Training kharna hun hi Rev. Lalsangbera, FG&CC Director-in a kaihhruai a, Rev. F. Lalrinnunga, Synod Moderator-in training chhuakte hnenah Certificate semin thuchah a sawi. He Counselling Training-ah hian Mizoram Synod Pastor 15 leh Phai Synod, Myanmar atangin Pastor 3, an vaiin 18 an tel a ni. Training kharna inkhawmah hian Training chhuakte chuan an hlawkpui dan a lema an ziak chu entirin an hrilhfiah a, Rev. Hmingthansanga Pachuau, Marpara Ramthar bialtu chuan training chhuakte aiawhin thu a sawi a. Ramhlun Vengthar Pastor Bial Zaipawl te tum 2 zaiin, Upa B. Lalthanliana, Com. Member, FG&CC chuan Training chhuakte a tawngtaisak a ni. Thuchah sawitu, Synod Moderator chuan training chhuakte fuihna thu sawiin, an thil zirte chu tangkai taka hmang turin a fuih a. "Tunlai khawvelah Kohhran hian beihna tawk nasa viau mah se Kohhran hlutna hi a la pangngai reng a. Kohhran mipuite hian Pastor leh Upate chungah hian beiseina sang tak an la nei reng a, chu min beiseina chu kan vawn nun reng a ngai a ni" a ti. FG&CC hian Pastoral Care & Counselling Training hi Pastor-te pualin vawi 28 buatsaih tawhin, Pastor 479 training a neihpui tawh a. Church Leader-te puala kum 2002 atanga training a neihpui tawhah Kohhran hruaitu 599 Training pek an ni tawh bawk a ni. Synod hian Counselling Centre pasarih - Mission Veng, Bawngkawn, Vaivakawn, Champhai, Serchhip, Kolasib leh Lungleiah te a nei a, 2019 kum tir lamah hian Mamit-ah Centre hi hawn belh tura ruahman a ni bawk. Heng Counselling Centre pasarihah hian tun thlenga pantu (Client) an neih tawh zat chu mi 24,626 an ni.