Mizorama Pathian thu zirna hlun leh changtlung bera ngaih Aizawl Theological College chuan November 26, 2018 (Thawhtanni) khan College Day vawi 53-na lawmna hun an hmang. Programme hi Rev. Lalramliana Pachuau, Synod Sr. Executive Secretary i/c, Theological Education-in a kaihruai a, ATC Principal Rev. Dr. C. Lalhlira chuan Day lawm tura mi sâwmte lawmna leh December 2017-November 2018 chhunga ATC rawngbawlna leh hmasawnna hrang hrang chanchin a sawi a. Rev. Dr. C. Lalhlira hian Pathian leh Kohhranhote duhsakna changa Principal term a hman zawh theih avangin lawmthu a sawi a, principal thar tur Rev. Prof. Vanlalnghaka Ralte hnenah duhsakna a hlan a ni. Rev. Dr. Roger Gaikwad chuan,"Humanity and Spirituality in the Face of the Fourth Industrial Revolution" tih thupui hmangin thuchah pawimawh tak a sawi bawk. ATC Day-ah hian 2017-2018 Session chhunga zirlai titha zualte hnenah Synod Secretary (Sr) Upa R. Dengzikpuian Proficiency Award leh Subject hrang hrang a tithate chwimawina a hlan a ni. Academic Session liam ta a BD first class-a zo, Students' Body President kal chhuak ta, Zosangliana Rokhum hnenah "Best Outgoing Award" hlan a ni a; Bachelor of Christian Studies (BCS) zir chhuak mi 8 hnenah degree hlan a ni bawk. ATC Male Voice leh ATC Choir te hnen atangin fakna hla ngaihthlak a ni a. Rev. Vanlalrova Khiangte (Member, Synod Theological Board)-in malsawmnain a tin a ni. Tun dinhmunah zirlai 177 an awm a, mipa 136 niin, hmeichhe 41 an ni a. B.D zirlai 107; M.Th ah 61, D.Th ah 6 leh DCPC ah mi 3 an ni. Heng zirlaite hi hnam hrang hrang an ni a, zirlai tam ber hi Mizoram chhung mi niin, heng bakah hian kan thenawm State atangin Assam-3, Manipur-11, Meghalaya-5, Nagaland-15, Tripura-2, Myanmar-2 an vaiin mi 38 zet an ni. ATC hi kum 1907 Zosaphluia hova din a ni a, tunah chuan BD course bakah, Department hrang hrangah pasarihah Master of Theology zirna a awm a; Department pathumah Doctorate of Theology zirna kalpui mek a ni bawk. ATC Day hi kum dangah chuan November thla Zirtawpni hnuhnung ber dawttua hman thin ni mah se, MLA Inthlan hunin Synod hun ruat sa dang a nghawng avangin ATC Day hi Thawhtannia sawn a ni. [wpdevart_gallery lost_ids="" gallery_id="10" album_id="1908" popup_albums_themes="" popup_themeid="1" theme_id="1" order_type="kirpich"]