November 15-25, 2018 chhung khan Chhim Working Committee-in kum tina alo buatsaih thin angin Borapansury khuaah Chakma Convention 2018 chu hlawhtling takin a buatsaih leh ta. He convention-ah hian kum danga a lo kalpui thin dan ang lo deuhvin Crusade bakah hian Football tournament te, Chakma cultural lam intihsiak te leh Gospel Concert te buatsaih tel a ni bawk. Chhun lamah khelmualah Football tournament huaihawt a ni a, Chakma khaw hrang hrang atangin Team 16 lai an lo tel thei a. Champion team leh a dawttu hian lawmman pawisa fai leh Trophy mawi tak an dawng. Zan lamah Chakma hnam lam intihsiak mai bakah Special item hmuhnawm tak tak entir a ni a, intihsiakte tan hian lawmman tha tak buatsaih sak a ni. Hemi kar lakah hian Rev. Sujindra Chakma, Damdep bialtu Pastor chuan Pathian thuchah a sawi thin a, zan tin hian mi 1000 chuangin Crusade hi chhim thin a ni. Zan lam Programme-ah vek hian Bawngkawn Branch KTP te chuan Gospel Concert neiin zai mai bakah Musical Drama te, Mizo hnam lam (cheraw) te entirna hun an nei a, mi lawm an hlawhin an ngaihlu em em a ni. He Convention-ah hian Chhim Working Committee hotute bakah Lunglei Synod Office staff te, Masihi Sangati Lunglei Gospel team te, Chhim bial chhunga Missionary leh an chhung te, Tlabung Zodin bial kohhran mite an thawkrimin thahnem an ngai hle a. Mi 17 laiin baptisma changin mi sang chuang Chakma ringlote hnenah Lal Isua Chanchin Tha puan chhuah a ni bawk. Hei bakah hian John Williams Hospital atangin Doctor leh staff-te chuan free clinic neiin a thlawna inentirna hun an siam bakah a thlawnin damdawi pawh tam tak an sem a ni. [wpdevart_gallery lost_ids="" gallery_id="569" album_id="1890" popup_albums_themes="" popup_themeid="1" theme_id="1" order_type="kirpich_"]