Mizoram Presbyterian Kohhran chuan nakkum 2019-a Nilai leh Beihrual Thupui leh Puitling Sunday School zirlaibu tur chu a tichhuak ta. Heng lehkhabu pahnihte hi Mizo lehkhabu malkhaiah chuan copy chhut chhuah tam berte an ni a. Puitling Sunday School zirlaibu hi copy 83,000 zet chhut a niin, Nilai leh Beihrual Thupui hi copy 66,000 chhut a ni a, a copy chhut tam ber tum a la ni. Nakkum 2019 hian Mizoram Presbyterian Kohhran chuan Puitling Sunday School-ah "Chanchin Tha Hril" tih an zir dawn a. He zirlaibu hi Presbyterian Pastor-te zinga mithiam, Rev. K. Lalrinmawia, tuna Mission Board Secretary ni lai mek ziah a ni a. He zilaibuah hian zirlai 47 awmin phek 240 zeta chhah a ni bawk. Mizoram puma Synod Bookroom dawr zawng zawngah lei theih tura chhawp chhuah mek a ni a, a chhut man Synod-in 25% a subsidised avangin Rs. 100 chauh-a lei theih a ni ang. Mizoram Presbyterian Kohhran Puitling Sunday School zirlaibu hi Mizoram Synod hnuaia Kohhran zawng zawngte zirlaibu a nih bakah Presbyterian Church of Myanmar (PCM) hnuaia Phai Synod pumpui chuan an zirlaibu atan an hmang ve nghal zel a. Presbyterian Church of Myanmar leh Mizoram Synod Partnership Agreement angin Mizoram Synod chuan kumtin Copy 1000 zet a thlawnin Presbyterian Church of Myanmar hi a pe thin a ni. Kum 2019 Nilai leh Beihrual Thupui zirlai thupui tur hi "Kristiante leh tunlai khawvel" tih a ni dawn a. Mizoram Synod Moderator pawh lo ni tawh leh Presbyterian Pastor-te zinga mithiam, Rev. H. Lalchhanhima ziah a ni a. Thupui pawimawh tak a nih avangin Presbyterian Kohhran chauh ni lo, Mizo Kristiante tan lehkhabu tangkai tak tur a ni. Nilai leh Beihrual Thupui hi Mizoram puma Synod Bookroom dawr zawng zawngah lei theih tura chhawp chhuah tawh a ni. Nilai leh Beihrual Thupui bu hi phek 230 zeta chhah ni mahse Synod-in a chhut man eng emaw zat a tum avangin Synod Bookroom chuan Rs. 120 chauhvin a hralh thei dawn a. Hei bakah hian Kohhran Upa leh Pastor-te'n a thlawnin an dawng thei dawn bawk a ni. Puitling Sunday School zirlaibu bakah Synod Bookroom chuan 2019 Synod Calendar, keu chi leh phek mal chi pawh a peih fel tawh a, keu chi hi Rs. 60/- niin a phek mal hi Rs. 20 man a ni ang. Synod Calendar keu chi-ah hian rawtna lo lut fo tawh bawhzuiin Presbytery Map dah tel a ni. Calendar bakah hian Synod Diary leh Beginner atanga Junior Department zirlai puitu pawh peih fel a ni tawh bawk. Nilai leh Beihrual thupui, Puitling Sunday School zirlaibute leh Synod Calendar-te hi Synod Bookroom chuan sum tuak nan K|P, Kohhran Hmeichhia leh Pavalai zawrhchhawn phalsakte hnenah 10% discount-in a pechhuak thin a, hemi avanga zuarchhuak hi thahnem tak an awm thin bawk.