February 3, 2019 (Pathianni) chawhnu dar 1:30 hian Dawrpui Presbyterian Kohhran Biak In-ah Synod Mission Board hnuaia thawk tur Missionary tirhchhuah inkhawm neih a ni ang.
Tirhchhuah inkhawm hi Rev. C. Zorammawia, Secretary, Synod Mission Board-in a kaihruai ang a, Dr. Robert S. Halliday, Coordinator, Synod Mission Board-in Missionary tirhchhuah tur te inhmelhriattirna a nei ang a, Rev. R. Lalhmingthanga, Synod Moderator-in tirhchhuahna hun hmangin thuchah a sawi ang. Tirhchhuahte atangin thusawi tawi ngaihthlak a ni bawk ang. Rev. K. Lalrinmawia, Executive Secretary, i/c Missions, etc. chuan Missionary tirhchhuahte tawngtaisakna hun a hmang ang a, Mizoram Synod Choir leh Synod Mission Choir te hnen atangin Pathian fakna hla ngaihthlak a ni bawk ang.
He inkhawmah hian kum 2019-a Missionary pension a chhuak mi 13- te hnenah Citation hlan an ni bawk ang. Missionary tirhchhuah tur te hi mipa 32 leh hmeichhia 54, an vaiin 86 an ni a. Anni hian January 9 - 30 chhung khan Mission Veng Kohhran Hall-ah Orientation training an lo nei tawh bawk a ni. Orientation training-ah hian an awmna tur chanchin te, rawngbawl dan tur kal hmang te leh thil pawimawh hrang hrang an zir a. Tirhchhuah an nih hnu hian an awmna tur hmun theuh an pan tawh ang.