Vawiin (Feb. 13, 2019) khan Synod Hospital Board Committee chu J.M. Lloyd Hall, Synod Office-ah an thu a, member 42 an kal. Meeting hi Synod Moderator Rev. R. Lalhmingthanga’n a kaihruai a, Dr. L.H. Thanga Singson, Secretary hnen atangin report ngaihthlak a ni a. Secretary report zingah Synod Hospital-a damlo awmpuitute tan Khualbuk (mipa riahna khum 14 leh hmeichhe riahna khum 16 awmna tur) sak tura hmalak mek a nih thu te, Palliative Care kalpui mek chu mipuiin an hriat zau theih nan worshop leh seminar te Sorkar lam nen huaihawt thin a nih thu te, Community Based Rehabilitation (CBR) leh CBM project hnuaiah khaw hrang hranga rualbanlo te zawng chhuakin an tanpui thin thu te, February 2019 chhunga damlo rethei damdawi in awmman pe thei lo mi 186 te awmman Rs. 24,85,366/- chu Charity Fund atanga pek sak an nih thu te, mimal leh pawl, mi inphalte hnen atanga charity fund, donation leh thil chi hrang hrang dawn thin a nih thu te leh a thlawna thisen petu an awm reng thu te chu a langsar zualte an ni a, Hospital Statistics Report hetiang hian tarlan a ni bawk : Synod Hospital, Durtlang report (Jan. 2019) : 1. Mit (Cataract) zai zat - 15 2. Damlo inentir zat - 7466 3. Damlo admit zat - 1338 4. Naupiang zat - 211 5. Mitthi zat - 30 6. Operation neih zat - 498 John Williams Hospital, Lunglei report (Jan. 2018 - Jan. 2019) : 1. Damlo inentir zat - 4911 2. Damlo admit zat - 826 3. Naupiang zat - 146 4. Mitthi zat - 10 5. Operation neih zat - 83 Tun tumah hian 13 Months Pay leh Pension-a chhuakte thlahna chungchang te, Lateral entry-a lutte increment pek chungchang te, B.Sc leh M.Sc Nursing correspondence-a zir dilna te leh thawktu confirmation dilna te an ngaihtuah a ni.