Synod Literature & Publication Board (SL&PB) buatsaih English-Mizo Dictionary chu vawiin (April 12, 2019) chawhnu dar 2:30 khan Rev. B. Sangthanga, Exeutive Secretary i/c SL&PB, etc. chuan Synod Conference Centre-ah a tlangzarh.
He tlangzarhna inkhawm hi Rev. Dr. C. Chawnghmingliana, SL&PB Editor-in a kaihruai a, Upa C. Thanga, SL&PB Member-in Bible chhiar leh tawngtaina hun a hmang a, Upa H. Ronghaka, SL&PB Asst. Editor chuan inhmelhriattirna hun hmangin, a ni hian lehkhabu tlangzarh tur chanchin a sawi nghal bawk. Rev. Vanlalzuata, SL&PB BEC Member-in lawmthu sawiin, Rev. P.B. Mankima, SL&PB Member-in malsawmnain inkhawm a tin a ni.
SL&PB in English-Mizo Dictionary project a neih hi kum 30 zet kal ta atanga intan a ni a. Kohhran leh ram mamawh lehkhabu chhuah tura ding a nih anga he lehkhabu hi project-a an neih a ni a. Mi thiam 19 thlang chhuakin chan insema Dictionary chu buatsaih tura ruahman chhoh a ni a. En dik leh siam rem (edit) hna thawk turin mi thiam 12 ruat leh an ni a. Anni hian uluk leh thahnemngai takin en dik hna an khawih zui a ni.
En dik hna hi uluk taka kalpui a nih avang hian a hun chhung a rei lo thei lo va, changtlung leh chhawr nahawm zawka tihchhuah thaa hriat a nih avangin a buatsaih chhung hi a rei lo thei ta lo a ni. En dik chhung a rei bawk a, Synod Literature & Publication Board (SL&PB) Editor pawh tuna tang lai nen panga lai an in thlak hman a, a ziaktute zinga mi panga chuan chatuan ram min pansan hman bawk.
He Dictionary hi Rs. 450/- man tur a ni a. Thumal (word) zawng zawng hi a hrilhfiahna zawhah hian a hman dan tur entirna sentence dah nghal zel a ni bawk. Synod Bookroom-ah lei theih a ni ang.