Aizawl Theological College chuan April 12, 2019 (Zirtawpni) khan an zirlai kumina zir zova chhuak tur mi 66 te thlahna inkhawm (Valedictory Service) an hmang.
He inkhawm pawimawh leh urhsun tak, ATC Chapel-a neih hi Rev. Prof. Vanlalnghaka Ralte, Principal-in a kaihhruai a; ATC-a thawktute leh zirlaite bakah, Synod hotu pawimawh te, Theological Education Board member te leh he hun hmanpui tura mi sawm bik mi thahnem tak an tel a ni.
Inkhawm hruaituin mi sawm lo kalte lawmna thu a sawi zawhah Pathian be turin mipui a sawm a; Rev. Andrew H. Laltlanliana’n tawngtaia bul a tan zawhah, Rev. Lalenkawla’n lawm thu tawngtaina hun a hmang zui a; Rev. P.C. Vanlalhruaia kaihhruaiin sual thupha chawina hun hman a ni.
Hetianga tawngtainaa inhlan a nih hnu hian zirlai thlah turte hming lama tar chhuahna hun hman a ni a. Rev. Dr. H. Vanlalruata, Dean of Graduate Studies chuan B.D. zo thar mi 27 te leh DCPC zir zo mi 3 te chu mipui hriatah an hming lamin a dintir a; Rev. Dr. H. Lalrinthanga, Dean of Post Graduate Studies chuan department hrang paruka Master of Theology (M.Th) zir zo mi 34 te a rawn dintir ve leh hnuah, kumina Doctor of Theology (D.Th) zo tur mi pahnihte pawh Dean of Doctoral Studies, Prof. Lalnghakthuamin a pho chhuak bawk.
He hun hmanpuitu, Rev. Lianhmingthanga Sailo, Senior Executive Secretary, Mizoram Synod chuan zirlai kal chhuakte hnenah Certificate hlanin, zirlai chhuakte thlahna thuchah pawimawh tak a sawi a. “Lal Isuan Petera hnenah, ‘Hengte ai hian nangin kei min hmangaih zawk em?’ tia a zawhna kha keimahni inzawt nawn fo ila, taima tak leh thahnem ngai taka rawngbawin, thil dang zawng aiin Pathian leh a rawngbawl hna hi ngaih pawimawh tlat tur a ni” tiin fuihna thuchah ropui leh ngaihnawm tak a sawi a ni.
Hemi hnuah hian ATC Principal kaihhruaiin zirlai kal chhuakte chuan thiamna leh hriatna petu Pathian hnenah, an thiamna leh an hriatna te Pathian ropui nan an hlan a ni. Rev. Dr. B. Lalnunzira kaihhruaiin tawngtai rual a ni a, theological college hrang hranga thawktu leh zirlaite tan te, tum nghet tak leh hmathlir fel tak neia kohhran a kal zel nan te, ATC atanga zir chhuak tawh, hmun hrang hranga rawngbawl mek tan te, kumina zir chhuak tan te a tawngtai a ni.
He hun tawp lamah inthlahna thuchah tawi mi pathum hnen atanga ngaihthlak a ni. Faculty aiawha thlahna thuchah sawitu Rev. Vanlalrawna chuan, ATC-a an zir chhung zawnga sulhnu tha leh chhinchhiah tlak an hnutchhiah avangin graduate tharte lawm thu a hrilh a. Rim taka an zir hnua an zirlai an zir zo thei chu thil ropui tak a nih thu sawiin, zirlai chhuak turte chu an hmaah chona lian tak leh harsa khirh tak pawhin lo hmuak mah se, zam lova hmachhawn zel turin a fuih a ni.
Zirlai la cham zel turte aiawhin Students’ Body President thar, R. Lalengkima chuan an senior-ten an zirlai tluang taka an zawh tak avangin a lawmpui thu a sawi a, anmahnia entawn tur thil hrang hrang an neihte chu theihnghilh a nih ngai loh tur thu a sawi a; Pathian thuruk enkawltu ni zel turin duhsakna a hlan.
Hemi hnu hian zirlai chhuak tur mi 66 te aiawhin F. Lalremruata’n thuchah hnuhnung a sawi ve thung a. Students’ Body Gen. Secretary kal chhuak ta hian Pathian thu an zir theihna tura puitu Mizoram Synod te, TEB te, ATC Faculty leh Staff te hnenah lawm thu a sawi a; an chhhungte theuh hnenah pawh an zir chhung zawnga sum leh pai bakah tawngtainaa an chelh tlat thin avangin lawm thu a sawi a ni. An zir laia field education an tihna thin kohhrante hnenah, “Duhsak takin min kaihhruai a, in hnen atangin thil tha tam tak kan zir chhuak a, heng kan zir chhuahte hi kan rawngbawl zelna atana min puitu tha tak an nih ngei kan beisei,” tiin tualchhung kohhran hruaitu an mahni lo enkawl thintute lawm thu a hrilh bawk. An kalsan tur an zirlaipuiten zah thiam taka an en thin avangin lawm thu a hrilh a, an inthian thatna hlu tak leh engkimah an nun ho dial dial thinna chu an theihnghilh loh tur thu a sawi lang a; an fel lohna leh tlinlohnate chu hre reng lo tur te, an pawi an lo sawi palh a awm pawhin ngaidam turin a ngen a; “Pathianin ATC malsawm rawh se,” tiin a thu hi sawi a tlip a ni.
ATC Music Teacher kaihhruai, Vaivakawn Pastor Bial Zaipawlin Pathian fak hla mawi tak tak pahnih an rem a. Hun tawp lamah Rev. Prof. Lawmsanga’n lawm thu sawina hun a hmang a; “God will take care of you” tih hla sak zawhah Rev. K. Luangmuana, TEB member chuan malsawmnain Valedictory Service 2019 hi khar ta a ni.
Kum danga an tih thin angin zirlai ti thate hnenah Prize chi hrang pasarih sem a ni a, lawmman semtu Rev. R. Vanlalnghaka, Synod Secretary hi Rev. Prof Tlanghmingthanga, Registrar-in a pui a ni. Heng lawmman sem chhuah zinga ngaih ven hlawh tak pahnih, an zirlai baka thil tih hona hrang hranga zirlaiten tha bera an ngaih, ballot paper hmanga an thlan thin, Upa R. Zobela Memorial Prize leh B.D. final year zinga thu sawi thiam bera Faculty ngeiin a thlan, Rev. Liandova Memorial Prize te chu kum 2019 hian C. Zaihnuna’n a dawng a. He lawmawm ngaihhlutawm tak huitu New Champhai tlangval hian, “Chhungkua kan nih angin kan nui ho va, kan tah leh kan mittui a far za a; thawh tur eng pawh kan thawk ho dial dial thin. He college hian zai khata luan hlutzia min kawhhmuh a, tanrual hi chakna a ni tih thuruk min zirtir a ni,” tiin ATC chungchang a sawi.
Kumina ATC atanga zir chhuakte hi B.D. = 27; M.Th = 34; D.C.P.C. = 3; D.Th = 2, an vaiin mi 66 an ni a; an zinga mi 29 (43.93%) te hi Mizoram pawn atanga rawn zirte an ni. D.Th zirlai pahnihte hi Rev. Dr. H. Vanlalauva leh Rev. Dr. L.H. Rawsea te hnuaiah an thawk a; May thlaah an dissertation an theh lut ang.
M.Th. zir zo thar zinga pahnih, Rev. Zairemkima (History of Christianity), May thla atanga Thingdawl Bial vawng tur leh Rev. Dailamthanga (Missiology) te chu Mizoram Synod hnuaia pastor hna thawk lai an ni.
Inkhawm ban hian Chapel kawtah duhsakna chibai inbuk tawnin hun hlimawm leh zalen tak hman a ni a, tlai lam dar 4: 00-ah inthlahna ruai tui tak kil ho a ni.