April 16, 2019 (Thawhlehni) khan Missionary Training College, Aizawl chuan Graduation Day vawi 7-na an hmang a. Missionary ni tura inbuatsaih, Bachelor of Missiology (B.Miss) zir chhuak mi 15-te hnenah Certificate hlan a ni a. Zirlai ti thate hnenah award chi hrang hrang pariat hlan a ni bawk. He hunah hian Synod hotute leh Kohhran hruaitute bakah sawm bik mi 300 zet an kal khawm a ni. MTC Graduation Day hi Rev. Lalramliana Pachuau, Presbyterian Church of India General Assembly Moderator chuan hmanpuiin Graduation Day thuchah a sawi a. Mission hna chu Pathian mission a nih thu te, Chanchin Tha hril chu Kohhran hna pui a nih thu te leh Kohhran chu mission avanga lo awm a nih thute a sawi a. A aia hna pawimawh zawk a awm loh avangin Missionary training pawh tihchangtlun deuh deuh a tul thu a sawi. Moderator hian College Magazine thar a tlangzarh nghal bawk a ni. MTC Graduation Service hi Principal Rev. Vanlalrova Khiangte-in a kaihruai a. MTC Registrar Rev. Remlalfakan graduate tharte hmelhriattirna leh pho chhuahna a nei a. Pathian awmpuina dila Pu Lalrinliana Colney a tawngtai hnuah Rev. J.H Lalhruaizelan lawmthu sawi tawngtaina a kaihruai a. Rev. Lianhmingthanga Sailo, Sr. Executive Secretary-in Certificate hlanin, Synod Secretary Rev. R. Vanlalnghakan lawmman chi hrang hrang a hlan bawk. Synod Mission Board Secretary Rev. C. Zorammawian graduate tharte rawngbawl tura inhlanna a neihpui a, Rev. Dr. Vanlalnghaka Ralte, MTC Governing Board member chuan tawngtaisakna hun a hmang. He hunah hian Synod Mission Choir-ten thiam takin Pathian fakna hla an sa a ni. Zirlai tithate hnena award sem chhuah pariat dawngtute chu C. Zothantluangi, N. Seema Devi, Zomuanpuii, Vanlalmuanpuii leh Lalawmpuia te an ni a. A pumpuia titha ber lawmman Academic Excellence Award chu Zomuanpuii hnenah hlan niin, Vanlalmuanpuii chu Best Outgoing Student lawmman pek a ni bawk. Heng award-te hi rawngbawlnaa mi hming tha mual liam tawhte hriat reng nana an chhungte sum thawh khawm atanga pek a ni. MTC Faculty aiawh Dr. Laldineni leh zirlai pahnihte hnen atanga inthlahna thu tawi bakah Upa R.K. Ramherliana hnen atangin lawmthu sawi ngaihthlak a ni a. MTC Governing Board member Rev. Chuauthuaman inkhawm hi malsawmnain a tin a ni.