Presbyterian Bible School chuan vawiin (April 23, 2019) chawhnu dar 1:00 khan Batch 45-na pualin Farewell and Dedication Programme Pi Zaii Hall, Synod Conference Centre-ah an hmang. Programme hi Rev. K. Lalrinmawia, Executive Secretary i/c PBS in a kaihruai a, Bible chhiar leh tawngtaina te a hman zawhin Rev. Dr. P.B. Lalmalsawma, PBS Zirtirtu-in inlawmna leh inhmelhriattirna hun a hmang a. PBS Principal Rev. Lalneihvura’n report a pe. Mizoram Synod Secretary (Jr.) Rev. Vanlalrova Khiangte-in zirchhuakte hnenah certificate a hlan a, Nl. Lalruatdiki, Mission Vengin Pathian fakna hla a sa bawk. Rev. K. Lalrinmawia’n zirlaite hlanna neiin thuchah a sawi a, zirlai exam-a titha te leh class kal kimte hnenah Mizoram Synod Statistician Upa C. Lalbiakthanga’n lawmman a hlan a, Pu C. Awithanga Award pawh Pu C. Awithanga chhungten hlanna an nei bawk. Upa Zoliana Royte, PBS Board Member-in zirlaite tana tawngtaisakna a nei a. Zirlai aiawhin Lalremkima’n thu a sawi a, Rev. H. Lalrinmawia, PBS Zirtirtuin lawmthu sawina hun a hmang a, Chairman-in malsawmnain programme a khar a ni. PBS-ah hian a din tirh atangin tun thleng hian zirlai 2189 an awm tawh a, chung zinga 1853 ten tha takin an passed a ni. Tuna batch 45-naah hian zirlai 35 an awm a, 26 ten tha takin an pass a, exam lo 8 leh fail 1 an awm a ni. Exam-a titha zual pathumna thlengin lawmman Rs.1000/-, Rs.700/-, Rs.500/- leh Lawmpuina thuziak PBS Committee hminga hlan an ni a, chungte chu:- 1st – Zodinsangi D/o K. Rosangliana, Chaltlang Kohhran leh H. Lalrintluangi D/o H. Lalmalsawma, Hualngohmun Kohhran 2nd – Lalliankimi Chawngthu D/o C.R. Lalzarliana, Nursery Venglai Kohhran 3rd – Lalremkima S/o P.S. Thangchungnunga, Ramhlun Vengchung Kohhran Batch 45-na zirlai zingah hian class kal kim mi 10 lai an awm a, an hnenah lawmman Rs.500/- theuh hlan a ni. Kum 2014 atangin zirlai zinga Christian Theology leh Church Administration & PCI Constitution Subject-a titha ber hnenah Pu C. Awithanga Award hlan thin a ni a, award hian pawisa fai Rs.1,000/- a keng tel a ni. Tun tumah hian Zodinsangi D/o K. Rosangliana, Chaltlang Kohhran chuan Christian Theology-ah 90% a hmu a, H. Lalrintluangi D/o H. Lalmalsawma, Hualngohmun Kohhran chuan Church Administration & PCI Constitution-ah 90% hmuin titha ber nihna an hauh a ni. Presbyterian Bible School atanga zir chhuak tam berte hi rawngbawlna tangkai takah an in hmang zui thin a. Sunday School zirtirtu, Missionary, Social Worker hna thawkte an awm nual a. B.D. leh B.Miss. zawm pawh engemaw zat an awm tawh a ni. Synod Revival Speaker leh Team member tam zawkte hi Bible School atanga zir chhuak an ni bawk. Zir tluan chhuak thei lo te erawh hi chu Aizawla awmna tur mumal nei lo te, sawrkar hna an hmuh vangte leh hrisellohna avanga zir tluan thei ta lo te an ni.