Synod Finance Committee vawi 130-na, ni hnih chhung awh tur chu vawiin (May 14, 2019) atang khan JM Lloyd Hall, Synod Office-ah an thukhawm a, meeting-ah hian Aizawl khaw pawn member 34 atangin 29 an lo tel thei a, Aizawl khawpui chhung member 24 atangin 23 an lo tel thei a; an vaiin 52 an tel thei a ni.
Committee hi Synod Moderator Rev. R. Lalhmingthanga’n a kaihruai a, Secretary leh Finance Officer Reports ngaihthlak a ni. Reports-ah hian kum 2018-19 tangka kum chhunga sum hmuh dan tar lan a ni a, sum hmuh zawng zawng chu Rs. 2,47,97,96,450/- (Nuai Singhnih sangli zasarih sawmkua pasarih leh singkua sangruk zali sawmnga) a ni a. Budget khumna chu Rs. 46,53,98,450/- (Nuai Sangli zaruk sawmnga pathum leh singkua sangriat zali sawmnga) niin kum hmasa khumna chu Rs. 38,89,23,848/- (Nuai Sangthum zariat sawmriat pakua leh singhnih sangthum zariat sawmli pariat) a ni. Kum hmasa aia punna hi 18.60% a ni. Tun tum Finance Committee hian Synod sum dinhmun a thlir bakah Mission Reserve Fund-a sum dah chungchang te, Audit Report te an thlirho ang.