Nizan (May 16, 2019) atang khan Missionary Retreat for Home Mission & Cachar Tlangram Region vawi 4-na chu Bethlehem Venglai Kohhran Biak Inah tan a ni ta. Retreat hi May 19, 2019 (Pathianni) zanah a tiak ang.
Retreat-ah hian thupuiah “Inpekna (Rom 6:13)” tih hman a ni a, Speaker atan Rev. C. Zorammawia, Synod Mission Board Secretary an hmang ang. Nizan (May 16, 2019) khan Vantlang Pathian Biak Inkhawm neih a ni a, inkhawm hi Rev. K. Lalrinmawia, Executive Secretary i/c Mission etc. in kaihruaiin inlawmna thu a sawi a. Synod Moderator Rev. R. Lalhmingthanga’n Keynote Address a pe a, Synod Mission Choir leh Durtlang Bial Zaipawlte an zai bawk.
Vawiin (May 17, 2019) hian chhun lamah Rev. Lalchhuanmawia, BEC Member buatsaih ‘Mimal hnena Chanchin Tha hril (Personal Evangelism)’ tih thupui zirho a ni a, sawihona hun hman a ni bawk. Zanah Vantlang Pathian Biak Inkhawm a awm leh ang a, Speaker hnen atangin Pathian thuchah ngaihthlak a ni ang a, Lungleng I Bial Zaipawl leh Thuampui Bial Zaipawlte an zai bawk ang. Zanin atanga Pathianni zan inkhawm ban apiangin Zaikhawm neih thin a ni ang.
May 18, 2019 (Inrinni) chawhmaah Vantlang Pathian Biak Inkhawm a awm leh ang a, Speaker hnen atangin Pathian thuchah ngaihthlak a ni ang a, Ramthar Veng Bial Zaipawl leh Hunthar Bial Zaipawl te an zai bawk ang. Chawhnu lamah Zaikhawmpui neih ang. Zanah Vantlang Pathian Biak Inkhawm awm lehin Speaker-in Pathian thuchah a sawi leh ang a, Zonuam Bial Zaipawl leh Maubawk Bial Zaipawl te an zai ang.
May 19, 2019 (Pathianni) chawhma inkhawmah Speaker hnen atangin Pathian thuchah ngaihthlak a ni ang a, Mizoram Synod Choir leh Mission Vengthlang Bial Zaipawlte an zai ang. Chawhnu inkhawmah Thawktu thi te Sunna hun hman a ni ang a, Retreat Speaker hnen atangin Pathian thuchah ngaihthlak leh a ni ang a, Synod Mission Choir leh Zemabawk North Bial Zaipawl te an zai bawk ang. Zan inkhawmah Rev. K. Lalrinmawia, Executive Secretary i/c Mission etc. in Pathian thuchah a sawi ang a, Synod Mission Choir leh Bethlehem Venglai Kohhran Zaipawl te an zai ang.