Vawiin (May 17, 2019) chawhma dar 10:00 khan U.S. Ambassador to India 25-na, Mr. Kenneth Ian Juster chuan Synod Office-ah Synod Puipate rawn tlawhin inkawmna hun hman a ni.
Mr. Kenneth Ian Juster hi Mrs. Patti Hoffman, Consul General to India, Kolkata in a rawn tawiawm a, a ni bakah hian Mr. James Dragon, Public Affairs Officer leh Mr. Jay Treloar, Assistant Public Affairs Officer te an lo tel bawk. U.S. Ambassador to India, Mr. Kenneth Ian Juster hi Mizoram a lo kal vawikhatna a ni a, Kohhranin vantlang nun chawi kâng tura a hmalakna hrang hrangte leh a bik takin HIV/AIDS chungchanga hmalak mekna te avangin Synod Puipate hi kawmna hun a rawn nei a ni. Synod Puipate hian Mizoram Synod hmingin an mikhualte hi Iptechei, English-Mizo Dictionary (SL&PB buatsaih) leh hun mawi tur Mizoram Map te an lo hlan a ni.
Mr. Kenneth Ian Juster hi November 24, 1954 khan New York, United States-a piang a ni a, thiamna lamah Harvard Law School atangin a Graduate a, John F. Kennedy School of Government, Harvard atangin Public Policy-ah Master Degree a zo leh a, Harvard College atangin Bachelor of Arts degree a nei bawk. Tuna a hna chelh hma hian US sawrkar hnuaiah chanvo leh nihna pawimawh tak tak a lo chelh tawh a, tunah hian Council of Foreign Relations and the American Academy of Diplomacy-ah member a ni mek bawk.
Mrs. Patti Hoffman, Consul General to India, Kolkata hian August 3, 2018 khan tuna a hna hi a thawk tan a, a bial enkawl chu West Bengal, Bihar, Jharkhand, Sikkim leh North East States te an ni. Consul General Mrs. Hoffman hi Philadelphia lam mi a ni a, Colombia University atangin B.A. (Biology) a zo a, University of Bristol, UK atangin International Relations-ah Master degree a zo leh a ni. Portuguese leh Spanish tawng a thiam tel bawk.