Mizoram Synod, Family Guidance & Counselling Centre (FG&CC)-in Kohhran hruaitute puala May 7, 2019 atanga Synod Conference Centre-a Church Leaders' Intensive Residential Pastoral Care & Counselling Training vawi 30-na a buatsaih chu May 20, 2019 (Thawhtan) zan khan ‘Final Evaluation & Graduation Service’ neiin khar a ni.
Training kharna hun hi Rev. B. Sangthanga, Executive Secretary i/c FG&CC-in a kaihhruai a, Rev. Lalsangbera, FG&CC Director-in inlawmna hun hmangin FG&CC report tlangpui a tarlang. Rev. R. Lalhmingthanga, Synod Moderator-in training chhuakte hnenah Certificate semin thuchah a sawi. He Counselling Training-ah hian Bial 7 atangin Kohhran tin aiawh mi 19 an tel a ni. Training kharna inkhawmah hian Training chhuakte chuan an hlawkpui dan a lema an ziak chu entirin an hrilhfiah a, Upa C. Sapchhawna, Kolasib Vengthar chuan training chhuakte aiawhin thu a sawi a. Maubawk Pastor Bial Zaipawl te tum 2 zaiin, Upa R.L. Thianga, Com. Member, FG&CC chuan Training chhuakte a tawngtaisak a ni.
Thuchah sawitu, Synod Moderator chuan training chhuakte fuihna thu sawiin, "Kohhranhote zingah nupa kar leh mimalah harsatna nei an tam sawt hle a, heng mite tanpui hi kan rawngbawlna tur pawimawh tak a ni" tiin an thil zirte chu tangkai taka hmang turin a fuih a a ni.
FG&CC hian Pastoral Care & Counselling Training hi Pastor-te pualin vawi 28 buatsaih tawhin, Pastor 479 training a neihpui tawh a. Church Leader-te puala kum 2002 atanga training a neihpui tawhah Kohhran hruaitu 618 Training pek an ni tawh bawk a ni.
Synod hian Counselling Centre pariat (8) - Mission Veng, Bawngkawn, Vaivakawn, Champhai, Serchhip, Kolasib, Lunglei leh Mamitah te a nei a. Heng Counselling Centre-ah hian April 30, 2019 thlenga pantu (Client) an neih tawh zat chu mi 26,357 an ni a, kumin bikah mi 1303 an nei tawh bawk a ni.