June ni 21–23, 2019 chhung khan Synod Revival Meet vawi 8-na chu Republic Veng Kohhran Biak Inah tluang taka neih a ni. Meet thupui atan hian “Pathian duhzawng” tih hman a ni.
June 21, 2019 (Zirtawpni) zanah Vantlang Pathian Biak Inkhawm neih a ni a, Rev. Lianhmingthanga Sailo, Senior Executive Secretary hnen atangin Pathian thuchah ngaihthlak a ni. June 22, 2019 (Inrinni) chawhmaah Vantlang Pathian Biak Inkhawm a awm leh a, Upa Lalchhanhima Hnamte (Mi Lungngaite Thian) hnen atangin Pathian thuchah ngaihthlak a ni a. Chawhnu inkhawmah R. Lalnunkima (Kraws Sipai) hnen atangin Pathian thuchah ngaihthlak leh a ni. Zan inkhawmah Rev. Dr. C. Chawnghmingliana’n Pathian thuchah a sawi.
June 23, 2019 (Pathianni) chawhma inkhawmah Rev. R. Vanlalnghaka, Synod Secretary-in Pathian thuchah a sawi a, chawhnu inkhawmah R. Zaihmingthanga (Gospel Thunder Team) in Pathian thuchah a sawi leh a, zan inkhawmah Synod Moderator Rev. R. Lalhmingthanga’n Pathian thuchah a sawi.
Inkhawm apiang hian zaipawl pahnih emaw pathum an zai thin a, inkhawm banah Lengkhawm neih thin a ni bawk. Report atanga a lan danin meet tan zan hian team member riak lut 247 an awm a, team member langa kal 241 awmin team member ni lo, riak luta chhimtu 6 an awm bawk.
Kumin Revival meet hi a vawi 8-na a ni a, Synod Revival Meet neih kum leh neih tawhnate leh thupui hrang hrang te hetiang a ni :
2012 Mission Veng Kohhran : Maichama mei a nung reng tur a ni (Lev. 6:13)
2013 Tuikual Kohhran : Harhna dik (Sam 80:18)
2014 Electric Veng Kohhran : Lal Isua zui (Lk 9:23)
2015 Zarkawt Kohhran : Rinawmna (Thupuan 2:10)
2016 Bungkawn Kohhran : Thlamuanna ( Jn 14:27)
2017 Ramthar Veng Kohhran : Min tiharh leh dawn lawm ni (Sam 87 : 5)
2018 Bawngkawn Kohhran : Sim rawh u (Mat 4:17)
2019 Republic Veng Kohhran : Pathian duh zawng
Tun dinhmunah Synod Revival Department hnuaiah hian Speaker 69 an awm mek a, Kohhrante sawmnaa an intirh bakah Sihphir Neihbawi-a Camping Centre-ah thla tin Gospel Camping vawi khat a buatsaih thin a, June 2019 thleng hian Camping vawi 50 buatsaih tawh a ni a, campers awm tawh zawng zawng zat chu 5880 an ni. Heng bakah hian 2017 March thla atang khan Aizawl khawpui dai vel leh khaw chhung hmun thenkhatah Operation Nehemia rawngbawlna an nei thin bawk.