Nimin (July 8, 2019) khan Synod Moderator, Rev. R. Lalhmingthanga chuan Rs. 3,71,53,670/- senga sak Inter-Cultural Centre, Aizawl Theological College, Durtlang Leitan-a mi chu hman theih turin a hawng.
He Centre hawnna inkhawm ATC buatsaih hi Rev. Dr. Vanlalnghaka Ralte, Principal-in a kaihruai a; Synod Senior Executive Rev. Lianhmangthanga Sailo a tawngtai hnuah he building duangtu Frederick Malsawmzuala’n a sak dan report a pe a. He Centre, square feet 19,159-a zau sak hna enkawltu chu R. Zoremsiama, Durtlang Leitan a ni.
Inter-Cultural Centre sak hna hi kum 2012 atang khan CWM Face to Face Inter-Cultural Centre tih hmingpua buaipui tan a ni a; a sak tan tak chu 2014 February kha a ni. He project hi Phase 1 leh Phase 2 tia then a ni a; tuna hman theiha sak zawh tak hi Phase 1 a ni. He Centre-ah hian floor 4 lai awmin, Guest Room 20, nuam leh changtlung tak bakah mi 120 lenna Seminar Room pathum a awm a; hengte bakah hian Lounge nuam tak te, Utility Room te, Kitchen leh mi 40 lenna Dinning Hall te pawh a awm a ni. Seminar Hall kawtah hian Reception Area zau tak zuah a ni bawk.
Phase 2 hi Auditorium Project a ni thung a. Inter-Cultural Centre chunga sak chhunzawm tura ruahman a ni. Mi 800 len theihna tura duan he Auditorium sak nan hian Synod chuan Rs. 2,17,53,000/- a ruahman a; kumin atang hian sak tan a ni ang.
Inter-Cultural Centre hawnnaah hian Synod Theological Education Board member te, ATC Faculty leh Staff te, zirlaite leh mi sawm bik an tel tha hle.
For more Pics Click Here