Nimin (July 9, 2019) chawhnu dar 1:30 khan Synod Higher Secondary School Multipurpose Hall thar chu Synod Moderator Rev. R. Lalhmingthanga’n Pathian hnenah hlanin a hawng.
Hall thar hawnna inkhawm hi Rev. K. Lalrinmawia, Executive Secretary i/c Eduction etc. in a kaihruai a, Pu Lalvena Hnamte, Principal, Synod Higher Secondary School -in inhmelhriattirna neiin report a pe a. Rev. R. Lalhmingthanga, Synod Moderator-in thuchah a sawi a, Headmaster lo ni tawh thin, Upa Lalthlengliana’n thusawina hun a hmang leh a, Principal kal chhuak tawh hnen atangin thusawi ngaihthlak a ni bawk. Zirtirtu atangin Group Singing leh zirlaite atangin Solo pahnih ngaihthlak a ni a, Pi Zirkungi, Vice Principal-in lawmthu sawina hun a hman zawhin, Pastor R. Laldinthara, Mission Vengthlang Bial vawngtuin malsawmnain programme a khar a ni.
He building sak hna hi kum 2013-2014 session atanga tan a ni a, chhawng sarih niin a chhawng sarihnaah hian Multipurpose Hall hi a awm a ni. Hall zau zawng hi a dung 91ft leh a vang 52ft a ni a, thuthleng (bench) 330 vel dah theih a ni dawn a, zirlai 1300 vel leng thei tura ngaih a ni. Building pumpui sak nan hian Cheng nuai zaruk sawmsarih leh pali dah a ni a, tun thlenga sum sen tawh zat chu Cheng nuai zanga sawmleh pariat vel a ni a, a la bang hian building pumpui hi sawk zawh theih an in beisei a ni.
Hall tur bik sak dawn hian Building Committee din a ni a, he committee ah hian thawktute atangin ruat an ni a, anni hian thil tul leh buaipui ngai ang te buaipuiin mawhphurhna an la thin a ni.
Hall hnuaiah hian Teachers’ Common Room, Vice Principal Room, Staff Meeting Room, Systems Room, Staff Lounge, Students Sick Room te la siam tura ruahman a ni a, a hnuai chhawng nga la awmah hian classroom tur room 17 awm tura ruahman a ni a, a sak hna hi la thawh chhunzawm zel a ni.
For more Pics Click Here