Zanin (July 26, 2019) dar 8:00 khan Central KTP-in Kristian Thalai chanchinbu kum 50 tlin lawm nana Inter Branch KTP Quiz a buatsaih Elimination Round Result chu Synfo Studio, Synod Office-ah Live-a puan a ni a, Logo insiamsiak result puan nghal bawk.
District hrang hrangah Branch 133 ten Elimination Round intihsiakna exam an neih atangin mark hmu sang Branch 20 te chu Semi Final Intihsiak hmachhawn turin an tling. Semi Final lut tura tlingte hi Bethlehem Venglai, Champhai Bethel, Chanmari West Hmar Veng, Chawlhhmun, Chhiahtlang Hmar Veng, Keitum Kawn, Khatla North, Khuangleng, Melthum, Mission Veng, Mualpui Bethel, Ramhlun East, Ramhlun Vengchung, Ramthar North, Republic Veng, Sihphir Vengthar, Thingdawl Venglai, Tlangnuam South, Vaivakawn leh Zemabawk Branch te an ni.
Elimination Round result puannaah hian Kristian Thalai chanchinbu Golden Jubilee puala hman tur Logo insiamsiak result puan nghal a ni bawk. Logo insiamsiakah hian mi 27 ten design hrang hrang 37 an thehlut a, lawmman dawngtu hi Lalthanmawia, College Veng, Aizawl a ni a, Rs. 2,000 a dawng.
Inter Branch KTP Quiz Semi Final hi Aug. 22 zan khian Dawrpui Kohhran Centenary Hall-ah intihsiak a ni ang. Bible atangin Luka, Timothea I, Timothea II leh Ephesi te intihsiak nana hman a ni ang a, hei bakah hian KTP chanchin, Mizoram Presbyterian Kohhran chanchin leh Kristian Thalai chanchinbu atangtein intihsiak tur a ni.
Quiz-ah hian pakhatnain Rs. 1,00,000, pahnihnain Rs. 40,000, pathumnain Rs. 20,000 bakah trophy leh citation an dawng ang. Palina leh pangana ten Rs. 5,000 leh citation leh, Semi Finalist ten Rs. 2,000 leh citation an dawng bawk ang. Semi Final leh Final-te hi Hruaina Êng channel-ah Live-a pek chhuah tur a ni.