Mizoram Synod, Family Guidance & Counselling Centre-in Kohhran hruaitute puala Church Leaders' Intensive Residential Pastoral Care & Counselling Training vawi 31-na, August 7, 2019 atanga Synod Conference Centre-a a buatsaih chu August 20, 2019 (Thawhlehni) zan khan Final Evaluation & Graduation Service neiin khar a ni. He hun hi Rev. B. Sangthanga, Executive Secretary i/c FG&CC chuan hmanpuiin Training chhuak mi 32 te hnenah Certificate a hlan.
He Training kharna inkhawm hi Rev. Lalsangbera, Director, FG&CC chuan a kaihruai a, Resource Person zinga mi Rev. Lalrinmawia chuan inlawmna leh lawmthu sawina hun hmangin, Training chhuakten an hlawkpui dan a lema ziakin an entir a, Upa H. Lalbiakthanga, Sihphir Vengthar chuan training chhuakte aiawhin thu a sawi a, Mission Vengthlang Pastor Bial Zaipawlte tum hnih zaiin, Upa R. Lalmalsawma, Com. Member, FG&CC chuan Training chhuakte a tawngtaisak a ni.
He hun hmanpuitu Rev. B. Sangthanga chuan thu sawiin, tunlaia kan ram dinhmun thlirin Kohhranhoten kawng tinrengah tan kan lak a ngaih thu a sawi a. Chumi atan chuan Training chhuakten an thil zirte tangkai taka hmang turin a fuih a ni.
FG&CC hian kum tinin Counselling Training hi tum thum a buatsaih thin a. Kohhran hruaitute puala vawi 31 a buatsaih tawhah mi 650 training chhuak awm tawhin, Pastor puala vawi 28 a buatsaih tawhah Pastor 479 training an awm tawh bawk.
Tunah hian Synod hian Counselling Centre hmun 8-ah neiin, July 31, 2019 thlenga pantu an neih tawh zat chu mi 27,452 an ni a, kumin bika pantu an neih tawh zat chu 2,713 an ni bawk.