Nimin (Oct. 2, 2019) khan Central Kohhran Hmeichhe buatsaihin J.M Lloyd Hall, Synod Office-ah Naupangte zinga rawngbawlna chungchang Seminar neih a ni.
Seminar-ah hian Bial tin aiawh mi 190 an kal a, Central Kohhran Hmeichhe Committee mi 46 nen an vaiin 236 an kal thei a ni.
Seminar hi hun hniha then a ni a, hun khatna hi chawhma dar 10:30-ah tan niin Kohhran Hmeichhe Inkhawmpui Lian Chairman Pi Lalrinkimi'n a kaihruai a, General Secretary Pi H. Lalfakmawii hnen atangin thupuan ngaihthlak anih hnuin Resource Person Pi K. Vanlalrawni, Mission Veng hnen atangin thupui "Naupang zinga rawngbawlna - chhungkuaah" tih chu zirho a ni a, sawihona neih a ni bawk.
Seminar hun hnihna hi chawhnu dar 1:30-ah tan leh a ni a, Kohhran Hmeichhe Inkhawmpui Lian Vice Chairman Pi Lalrinpuii'n a kaihruai a, Resource Person Rev. B. Sangthanga, Executive Secretary hnen atangin thupui "Naupangte zinga rawngbawlna - Kohhranah" tih chu zirho leh a ni a, sawihona neih leh niin hun tawpah Kohhran hmeichhe Inkhawmpui Lian Finance Secretary Pi Lalsangluaii'n lawmthu a sawi a ni.
Seminar-ah hian Exodus Choir, Ramhlun Vengthar ten Pathian fakna hla an sa a, Pi K. Lalliantluangi, Ex- Chairman, Kohhran Hmeichhe Inkhawmpui Lian-in tawngtaiin Seminar hi a khar a ni.
For more Pics Click Here