Rev. R. Lianbuanga (kum 79) pensioner chu October 3, 2019 chhûn dâr 12:30 khan Alzheimer leh pneumonia avangin Aizawl Civil Hospital-ah a thi a, vawiin (Oct. 4, 2019) chawhnu dar 1:00 khan Mission Vengthlang Kohhran Biak Inah Synod Moderator Rev. R. Lalhmingthanga’n a vui.

A chanchin tlangpui :
Rev. R. Lianbuanga hi Rev. Liandova leh Phailûti te fa pakaw zînga pasarihna niin January 31, 1940-ah Sialsûkah a piang a, an unau hi mipa pali leh hmeichhia panga an ni a, tunah hian an unau hi pathum an la dam a ni. A pa hi Pastor a nih avângin hmun hrang hrangah an pêm kual thin a, Phûldungsei chu a seilennaa a sawi theih ber chu a ni.

May 7, 1970-ah Lalmalsawmi d/o P.C. Sâpnêla (L) nên Dâwrpui Kohhran Biak Inah inneiin fa pathum an nei a, tû 13 a nei. An fate chu -

1. David Lalremruata h/o Zohmingthangi, Ramthar Veng
2. Dr. Mary Lianhmingthangi w/o Saitluanga Sailo, Chanmari
3. Vanlalchhuanga Renthlei h/o Zonunmawii, Mission Vengthlang 

Zirna lam : A pa Pastor Liandova thawhna hmun Phûldungsei-ah zirna bul tanin Mizo High School atangin Matric a pass a, Intermediate of Arts (IA) chu Guwahati University atanga pass-in B.A (Hons) chu St. Edmunds College, Shillong atangin a pass a ni. Kum 1964-1967 chhûng Serampore College-ah B.D zirin tha takin a zo va. Kum 1972-1974 chhûng Th.M (Christian Education), Columbia Theological Seminary, Georgia, USA-ah a zir leh a ni.

Rawngbawlna : Isaia 6:1-10 thu a chhiar atangin amah leh boral mêkte chu chhandam ngai an nihzia a hre thar zual a, chu chuan rawngbâwl tûrin a ko chhuak ta a. B.D a zir zawh kum 1967 June thlaah Pro. Pastor atân lâk nghâl a ni a, Dawrpui Bialah dahin Aizawl Theological School-a zirtîrtu hna nên a kawp a ni. Synod Inkhawmpui 1970 December-ah Moderator Rev. Saiaithanga’n Mission Veng Biak Inah Pastor atân a nemnghet a, Dawrpui Bial a vawng zui nghal a ni. Kum 1972-1974 chhûng Th.M a zir hnuah Dawrpui Bialah bawk awm lehin. kum 1975-1985 chhûng vawngin May-December, 1978 chhûng Chanmari Bial a hmui bawk.

Kum 1986-ah Council for World Mission hnuaiah an chhûngkuain Papua New Guinea-ah Missionary-in an kal a. Kum 1988 Synod Inkhâwmpuiin a rêl angin kum 1989 atangin Synod Executive Secretary tûrin an rawn chhuak leh a, kum 1991 thleng a thawk a ni. Kum 1992-1995 chhûng Shillong Bial a vawng a; kum 1996-1998 chhûng Delhi Field Secretary hna a chelh a; 1999-2000 chhûng Chanmari Bial vawngin kum 2001-ah a pension ta a ni.

Rev. R. Lianbuanga hian Pastor Bial a vawn bâkah hêng mawhphurhnate hi a chelh tawh a ni -

Synod Statistician - 1974
Central KTP Leader - 1977-1984
Synod Secretary - 1977-1978, 1979-1980
Synod Moderator - 1981
Assistant Leader, PYF - 1981-1982
Leader, PYF - 1983-1984
Synod Executive Secretary - 1989-1991

Hêng bâkah hian PCI Assembly Treasurer, Bible Society, Aizawl Branch President, Citizen Information Forum leh The Leprosy Mission-ah te President hna term khat theuh a chelh tawh bawk.

Rev. R. Lianbuanga hian nupa tuak 565 a inneihtîr a, mi 3663 Baptisma a chantîr bawk.

A nat dan : Rev. R. Lianbuanga hi mi hrisêl tak a ni a. Hun eng emaw chen atang khân thisen sâng leh zunthlum a nei a; amaherawhchu a nun phung tibuai khawp erawh a ni lo. 2011 kum chanve hnu lam atangin alzheimer natna a nei tan a, hei hian a nun leh a rawngbâwlnaah nasa takin a tibuai a, CMC & H, Vellore-ah kalpui a ni a. Kum 2014-ah lung lam tha lo avângin Medica Superspecialty Hospital, Kolkata-ah hruai a ni leh a. In lamah inenkawl zuiin buaina lutuk nei lovin a awm chhunzawm a.

Kum 2018 November thla tâwp lamah thi-in a ê a, Civil Hospital-ah enkawl a ni a. Amah hi a chak loh tial tial avângin kum 2019 kum tîr atang khân Civil Hospital, Ebenezer Hospital leh City Hospital-ah te lûtin ICU-ah te enkawl a ni thîn a. August 31, 2019-ah Ebenezer Hospital atangin Civil Hospital ICU-ah dah luh a ni a, Alzheimer bâkah pneumonia natna a nei tel tih hriat chhuah a ni ta zêl a. A natna chuan zual lam pan zelin October 3, 2019 chhûn dâr 12:30 khân thlamuang takin Lalpa hnênah a châwl ta a ni.

VUINA PROGRAMME

A hun : Ni 04.10.2019 (Zirtawpni), 1:00 PM
A hmun : Mission Vengthlang Kohhran Biak In
Vuitu : Rev. R. Lalhmingthanga, Moderator, Mizoram Synod
Hla sak ho : Vâna ka kumkhaw In chu (KHB No. 490)
Chanchin sawi : Rev. Vanlalrova Khiangte, Secretary (Jr.), Mizoram Synod
Zaipawl : Mission Vengthlang Kohhran Zaipawl
Thlamuanna Thuchah : Vuitu
Tawngtai sakna : Upa C. Lalbiakthanga, Statistician, Mizoram Synod
Zaipawl : Mission Vengthlang Bial Zaipawl
Hla sak ho : Thihna lui piahah khawpui mawi tak chu a awm (KHB No. 466)
Malsawmna : Rev. B. Sangthanga, Executive Secretary, Mizoram Synod
Thlanmual : Rev. R. Laldinthara, Bialtu Pastor