Vawiin (Oct. 18, 2019) khan Central KTP leh Campus Ministry tangkawp chuan Mission Veng Kohhran Hall-ah Christian Apologetics Trainers’ Training an buatsaih a. Hetah hian Aizawl khawpui chhung KTP Branch aiawh leh Aizawl khawpui pawn atangin Bial aiawh mi pakhat theuh tel tura sawm an ni a, mi 300 chuang an kal thei a ni.
Programme hi chawhma dar 10-ah tanin Rev. B. Sangthanga, Executive Secretary i/c KTP-in a kaihruai a, Resource Person Rev. Rosiamliana Tochhawng hnen atangin paper zirho a ni a, zawhna leh chhanna hun hman a ni bawk.
Chawhnu hun hi chawhnu dar 1 ah tan leh a ni a, Central KTP Leader Rev. Dr. K. Lallawmzuala’n programme a kaihruai. Resource Person Dr. Laldinliana Varte, Mission Veng hnen atangin paper zirho leh a ni. Zawhna leh chhanna hun hman a ni a, Central KTP General Secretary T. Upa Rochungnunga’n lawmthu sawina hun a hmang.
Kum 2019 KTP Rorel Inkhawm, Tuikual North Kohhrana neihah khan thupui zir tur hrang hrang lut zingah, Central KTP-in zir tur lo thlang se a tih angin, Central KTP chuan Christian Apologetics chungchang inzirtir hi a thlang a. Campus Ministry hmalakna pawimawh tak a lo nih bawk avangin an pahnih tangkawp hian an buatsaih dawn a ni.