Nimin (Oct. 24, 2019) khan Youth Recreation Centre-a Convention Centre sakna turin Central KTP leh Lushai Engineers-te chuan Central KTP Office, Synod Office-ah inremna an ziak.
Convention Centre sakna tur hian Central KTP aiawhin Rev. Dr. K. Lallawmzuala, Leader leh T.Upa Rochungnunga, General Secretary ten inremnaah hming an ziak a, Lushai Engineers aiawhin, Pu Lalbiaksanga, Director, Lushai Engineers chuan hming a ziak. Convention Centre sakna tur estimate hi Rs. nuai 700 a ni. Inremna ziah atang hian Lushai Engineers hian sa turin hma an la tan nghal dawn a ni.
Convention Centre hi ram pum huapa seminar, workshop leh punkhawmna buatsaihna tur a ni dawn a. Centre chhungah mi 650, gallery-ah mi 250, a vaiin mi 900 len theihna tura ruahman a ni. Mi 104 riah theihna tur pindanpui (dormitory) a awm ang a, choka bakah a ruala mi 60 ten chaw an ei theihna chaw ei pindanpui (dining hall) a awm ang. Inremna ziah ang chuan kum 2 (hnih) chhunga sa zo tura beisei an ni dawn a ni.