Vawiin (October 25, 2019) khan Student Christian Movement of India (SCMI)-ATC Unit chuan an din champhaphâk kum 50-na (Golden Jubilee) an lawm.
He hunah hian National Hqrs, Bangalore aiawhin Mr. Chongloi, Regional Programme Secretary te, he Unit-a hruaitu lo ni tawh te leh, AICS leh Mizoram Theological College ațangin mi țhahnem takin an rawn hman pui a ni.
Chawhma hun hi ATC Quadrangle-ah hman niin Lalhruaitluanga, President, SCMI: ATC Unit-in a kaihruai a. Rev. Dr. Vanlalnghaka Ralte, Principal, ATC chu Chief Guest niin, Student Christian Movement-te rawngbawlna hlut zia leh mi tam takte tana malsawmna an lo nih țhin tawhna te ram leh hnam tana chhunzawm zel turin a chah a, Jubilee Souvenir a tlangzarh bawk. Jubillee Speaker, Rev. Rosiamliana Tochhawng, Associate Proffessor, ATC-in Jubilee thupui "Lawm chunga Lalpa rawngbawl (Serving the Lord with a thankful heart)" tih a sawi a. Jubilee Female Voice leh ATC Male Voice ten Pathian fakna hla an sa bawk. He hunah hian Rev V.L. Luaia Hranleh in SCMI hlabu a tlangzarh bawk. Chawhma lam programme hman zawh hnu hian ATC Chapel tualah Jubilee dar vuak a ni a, ATC Faculty-te leh SCMI ATC Unit-a hruaitu ni mekte leh hruaitu lo ni tawh ten Jubile dar hi an vua a ni.
Chawhnu lam hi ATC Chapel-ah hman niin Rev. Dr. Tlanghmingthanga, Registrar, ATC-in a kaihruaia, Z. Lalduhzuala, General Secretary, SCMI ATC Unit-in report pe in, ATC Male Voice leh ATC Zaipawl ten Pathian fakna hla mawi takin an sa a ni. He hunah hian Rev. Dr. L.H. Rawsea hnen atangin Jubilee thuchah ropui tak ngaihthlak a ni a, tlai lamah Jubilee lawmna ruai kil ho zui nghal a ni bawk.