Nov. 3, 2019 (Pathianni) hi Khawvel Sunday School Ni a lo ni leh ta a. Kumin Khawvel Sunday School Ni-ah hian Mizoram Presbyterian Kohhran chuan puitlingah Mizoramin hun thim (ram buai) a hmachhawn laia mipuite pa nih tling tak, missionary "Rev. Dr. Allwyn Roberts-a chanchin" Upa Dr. Tawnenga ziah an zir ang a. Intermediate - Senior-in fahrah enkawltu mi ropui tak "George Muller-a chanchin" Upa K. Vanlalnghaka ziah an zir ang a, Beginner - Junior-in "Eric Liddell-a", Khawvel hmaa Isua tantu chanchin Rev. Laldintluanga ziah an zir thung ang.
Sunday School hi kum 1780-ah England ram, Gloucester khuaa Robert Raikes-a din a ni a. Dodalna nasa tak hnuaia bul tan ni mahse, Sunday School hi mi chanhaiten zirna an dawn theihna hmasa ber a nih avang leh Sunday School kaite nunah danglamna nasa tak an hmuh avangin a darh zau zel a. A tira hmuhsit taka elsentute ngei chuan, "Robert Raikes-a hian Gloucester khuaa sihal rualte chu beram novah a chhuah vek a ni," an ti hial a. Pawi khawihna tlahniama jail tang an tlem tak em avangin Gloucester khua leh a chheh vela dan lekkawhtu leh thubuai remtu inzawm khawmte chuan kum 1805-ah Robert Raikes-a hnenah inthurualin lawmthu sawina lehkha an thawn hial a ni.
India ramah July 9, 1803 atangin missionary ropui William Carey-a leh a thiante (Serampore Trio) hma laknain Sunday School neih tan a ni a. Mizoramah pawh Zosap Rev. D.E. Jones-a (Zosaphluia) hma laknain February 20, 1898 atangin mei mit lovin kan nei zui ve ta a ni.
Synod Inkhawmpui Vawi 95-na report-a a lan danin tunah hian MSSU hnuaiah Sunday School 1025, Hotu 4,586, Zirtirtu 48,424 leh Zirtu 3,89,482 an awm mek a ni.
Oct. 28, 2019 thleng a Sunday School chawimawina chi hrang hrang 6 pek tawh dan hetiang hi a ni-
| Hming | Pek tan kum | Dawng Zat |
| Pi Zaii | 1988 | 18691 |
| Pi Zaii Spl. | 1999 | 1181 |
| Zalawra | 1988 | 19795 |
| Zalawra Spl. | 1999 | 1469 |
| Diploma | 1967 | 9700 |
| Jubili | 1985 | 1253 |
MSSU Committee (Feb. 16, 1944:5)-in a rel angin Mizoramah chuan kum 1944 atangin Khawvel Sunday School Ni hman tan a ni a, 1949 atangin November Pathianni hmasa berah thupui neia hmang tanin, kum 2001 atangin puitling leh naupang lam ten zirlai hran an zir tan a. Aizawl Central Presbytery atanga rawtna lo lut, MSSU Comt. 162:6 of 24.10.2018-in a rel angin, kumin (2019) atangin naupang lam chu hmun hnih - Beginner - Junior leh Intermediate - Senior-ah then a lo ni leh ta a ni.