Mizoram Synod, Family Guidance & Counselling Centre-in kum tina an tih thin angin Nov 13-26 chhunga Intensive Residential Pastoral Care & Counselling Training vawi 29-na, Pastorte puala an buatsaih chu November 26, 2019 zan khan Final Evaluation & Graduation Service neiin khar a ni.
He Counselling Training hi Synod Inkhawmpui 2017-a Pastor nemngheh mi 20 leh Myanmar lam Pastor te 4 nen an vaiin 24 in hlawhtling takin an nei a ni.
He hun hi Rev Lalsangbera, Director, FG & CC in a kaihruai a, Rev R. Lalhmingthanga, Synod Moderator chuan hmanpuiin Trainees te hnenah Certificate hlanin thuchah a sawi. Moderator chuan, "Counselling hi mi tinin a remna apiangah kan thawk a ni a, inbiak dan te, indawr dan te hi zir theih leh tangkai tak a lo ni. Chhungkua leh Kohhranah te, midangte nena kan nunhona zawng zawngah hian awmze neia kan in dawr chuan nundan duhawm zawk hi a lo awm thin a ni," a ti.
Rev R.Lalnuntluanga'n Trainees te hi Final Evaluation a neihtir a, an zir atanga an sawtpuina lemziak hmangin trainee-ten an tarlang vek a ni. Rev J.Lalremsiama FG&CC Committee Memberin trainees te a tawngtaisak a, Rev Remlalpuia'n Trainees aiawhin lawmthu a sawi bawk. Mission Veng Pastor Bial Zaipawl ten hla pahnih an sa a, trainees atangin Male Voice an zai bawk. Kulikawn West Kohhran Committee member ten he hun hi an hmanpui a, Rev J.Vanlalhnuna Vaivakawn Centre-a Counsellor in malsawmna in a tin a ni.
Hetianga Counselling Training hi Certificate Course a ni a, kan Synod-in kum 1991 atang khan a lo kalpui tawh a ni. Church Leaders pualin vawi 31 leh Pastor pualin vawi 29 neih a ni tawh a ni.