November 26, 2019 chawhnu dar 1 khan Presbyterian Bible School (PBS) chuan Batch 47-na pualin Farewell and Dedication Programme Pi Zaii Hall, Synod Conference Centre-ah an hmang.
Programme hi Rev. R. Lalhmingthanga, Synod Moderator-in a kaihruai a, Rev. Vanlalngeiha, PBS Zirtirtu-in inlawmna leh inhmelhriattirna hun a hmang a. PBS Principal Rev. Lalneihvura’n report a pe. Executive Secretary Rev. K. Lalrinmawia’n zirchhuakte hnenah certificate a hlan a ni.
Moderator Rev. R. Lalhmingthanga’n zirlaite hlanna neiin thuchah a sawi a, zirlai exam-a titha te leh class kal kimte hnenah Mizoram Synod Secretary Rev. R. Vanlalnghaka’n lawmman a hlan a, Pu C. Awithanga Award pawh Pu C. Awithanga chhungten hlanna an nei bawk. Rev. Z.D. Lalhmachhuana, PBS Committee Member-in zirlaite tana tawngtaisakna a nei a. Rev. Dr. P.B. Lalmalsawma, PBS Zirtirtuin lawmthu sawina hun a hmang a, Chairman-in malsawmnain programme a khar a ni.
PBS-ah hian a din tirh atangin tun thleng hian zirlai 2309 an awm tawh a, chung zinga 1967 ten tha takin an passed a ni. Tuna batch 47-naah hian zirlai 60 awmin zirlai 59 ten tha takin an pass a, exam lo 1 a awm a ni. Exam-a titha zual pathumna thlengin lawmman Rs.1000/-, Rs.700/-, Rs.500/- leh Lawmpuina thuziak PBS Committee hminga hlan an ni a, chungte chu:-
1st – Lalrinzuala s/o Vanlalvena Singson, Sesawng Vengthar Kohhran
2nd – V.L. Thatpuii Pachuau d/o V.L. Vena Pachuau, Armed Veng Kohhran
3rd – Vanlalhruaii d/o Rohmingliana, Bawngkawn Chhimveng Kohhran te an ni.
Batch 47-na zirlai zingah hian class kal kim mi 21 lai an awm a, an hnenah lawmman Rs. 500/- theuh hlan a ni.
Kum 2014 atangin zirlai zinga Christian Theology leh Church Administration & PCI Constitution Subject-a titha ber hnenah Pu C. Awithanga Award hlan thin a ni a, award hian pawisa fai Rs.1,000/- a keng tel a ni. Tun tumah hian Lalrinzuala leh V.L. Thatpuii Pachuau ten Christian Theology-ah 90% ve ve an hmu a, Lalrinzuala’n Church Administration & PCI Constitution-ah 90% hmuin titha ber nihna a hauh a ni.