Vawiin (Jan. 13, 2020) chawhnu dar 1 khan Mizoram Presbyterian Kohhran Hmeichhiate enkawl Women Centre, Phunchawng-ah Puanthui zirna batch 6-na leh puantah zirna batch 4-na Opening Function hman a ni a. Kum 2020 chhunga training tur te hi puanthui-ah zirlai 40 leh puantah-ah zirlai 8 an ni a, an vaiin zirlai 48 an ni.
Kumin 2020 batch Opening Function hi Pi Lalrinkimi, Kohhran Hmeichhe Inkhawmpui Lian Chairman-in kaihruaiin, General Secretary Pi H. Lalfakmawii’n inhmelhriattirna hun a hmang a, Ludi R. Vanlalhmangaihi puanthui zirtur hnen atangin Pathian fakna hla ngaihthlak a ni. Pi R. Lalrinpuii, Women Centre Superintendent-in Hostel Rules leh inkaihhruainate a sawi a, zirlai lut tharte lawmna leh fuihna Pi K. Lalliantluangi, Ex-Chairman, Inkhawmpui Lian hnen atangin ngaihthlak a ni.
Women Centre hi Mizoram Presbyterian Project pawimawh tak a ni a. Hmeichhe dinhmun harsa leh khawsakna lama tanpui ngaite chawikanna atana din a ni a. Kum 2016 atang khan Puanthui zirna tan a ni a, tunah hian mi 180-in puanthui an zir chhuah tawh a. Kum 2017 atangin Puantah zirna tih belh a ni a, mi 18-in puantah hlawhtling takin an lo zirchhuak tawh a ni. Women Centre-a zir chhuakte engemaw zat hi mahni ke a dingin chhungkaw ei bel ber an ni ve mek a, midang zirtir chhawng a dawr siamte pawh an awm bawk. Chutih laiin mi hnuaia puanthui leh puantah a thawk mek thahnem tak an awm bawk.