Vawiin (Jan. 28, 2020) dar 12:30 p.m. khan Synod Charity Store, Vaivakawn a mi chu Pathian hnenah hlanin hawnna hun hman a ni. He Charity Store thar hi Vaivakawn Kohhran Centenary Building, kawngpui an, Synod Bookroom sira awm a ni.
Charity Store thar hawnna hunah hian Rev. J. Lalremsiama, Synod Statistician & Bialtu Pastor-in tawngtaina hun a hmang a, Pu R. Lalnuntluanga, Synod Social Front Coordinator-in report a pe. Rev. K. Lalrinmawia, Executive Secretry i/c Synod Social Front-in Pathian hnenah hlanin Charity Store thar hi hawng a, Rev. Dr. Lawmsanga, Social Front Executive Committee Member-in malsawmnain hun a khar a ni.
Synod Social Front Economic Cell chuan mirethei leh harsa zawkte tanpui kawnga Kohhran mipuite inphalna hi tangkai taka hman theih niin a hria a, a tul ang te bawhzuiin May 15, 2016 khan Mendus Building, Mission Vengah Charity Store hi hawn a ni. Synod Social Front Committee-in hawn belh nise a tih angin Vaivakawnah hian hawn belh a lo ni leh ta a ni.
Charity Store atan hian thawmhnaw, mutbu, bungbel, zirlaibu hlui etc. mi dang tana hman tlak ngei pe khawm turin Kohhranah ngenna a siam thin a, Kohhran pawl sawi lovin a duh apiang tan pawh pek khawm theih reng a ni. Bungrua te hi a that dan a zirin Rs. 100/- chin hnuai lama hralh tur a ni a, mi pakhat hnenah bungraw chi khat chu pali aia tam pek theih a ni lo ang.
