Vawiin (Feb. 5, 2020) chawhma dar 10:00 khan Synod Ramthar Board Committee vawi 168-na chu J.M. Lloyd Hall, Synod Office-ah an thu a, member 78 an kal a ni.
Committee hi Synod Moderator Rev. R. Lalchangliana’n a kaihruai a, Secretary Rev. C. Zorammawia’n report a pe a, report-ah hian January 19, 2020-ah Masihi Sangati Evangelist lak thar 16 tirhchuah inkhawm, Thakthing Veng Kohhran Biak Inah neih a nih thu te, February 2, 2020-ah Missionary lak thar 40 tirhchhuah inkhawm, Chaltlang Kohhran Biak Inah neih a nih thu te, CMC Vellore-a Staff Nurse turin Lalnunmawii chu term khat (2020-2022) chhung atan ruat a nih thu te, November 7-10, 2019 khan Damparengpui-ah Bru Convention vawi 4-na tluang taka hman a nih thu te, Synod Mission Board hnuaia thawk mek zingah kum 2020-a Contract renew zat 1091 an awm a, Field chhung transfer 51 leh Inter-Field transfer 49 an awm a, Transfer (Contract) 145 an awm thu tarlan a ni bawk.
Tun tum committee-ah hian thu pawimawh tak tak 11 zet ngaihtuah a ni. Thu ngaihtuah tur zinga langsar zualte chu - Association for Christian Thoughtfulness (ACT) nena thawhho rawtna te, MTC-ah zirtirtu contract-a rawih rawtna leh Music Class neih chungchang te, M.Th. zir dilpuina te, Board Member-te Ramthar Field tlawh chungchang te an ni.