Vawiin (Feb. 12, 2020) chawhma dar 10:00 khan Synod Hospital Board Meeting vawi 135-na chu J.M. Lloyd Hall, Synod Office-ah an thu.
Committee hi Synod Moderator Rev. R. Lalchangliana’n a kaihruai a, Synod Hospital Board Secretary-in report a pe a, report-ah hian Hospital Director ni lai Dr. L.H. Thanga Singson chu kum 2020-2021 chhung Director hna chelh chhunzawm tura thlan nawn a nih thu te, Synod Hospital Co-ordinator atan Upa Lalrinmuana, Synod Office-a Superintendent hna thawk lai chu 2020-2023 chhung thawk tura ruat a nih thu te, Nursing Superindentent (2020-2023) atan Pi C. Thankhumi ruat thar a nih thu te, Asst. Nursing Superintendent (2020-2023) atan Pi Vanlalhluni ruat thar a nih thu te, Vice Principal (2020-2023) atan Miss Lalrawnliani, Sister Tutor ruat thar a nih thu te, Synod Hospital thawktuten Charity Fund atan Rs. 1,40,000/- an thawh khawm thu te, Dr. Samuel Lalhruaitluanga’n CMC, Ludhiana atangin MS (ENT) tha taka a zir zawh thu te, kumin (2020) January thla chhungin mi inphalte hnen atangin Charity Fund atan Rs. 1,97,810/-, thilpek (donation) hospital mamawh hrang hrang leina tur Rs. 91,260/-, mitthi puan khuhna puan 20, KTP Branch 3 atangin thisen unit 109 dawn a nih thu te tarlan a ni a, January 2020 chhungin Eye Camp tum engemaw zat neih niin base camp-ah damlo inentir 173 leh zai zat 33 an awm thu te, school screening-ah damlo inentir 663 awmin outreach-ah mi 123 inentir an awm thu te tarlan a ni. January 2020 chhung khan Hospital-a damlo admit 1185 an awm a, nau piang 219 awmin mitthi 22 an awm a, major operation 261 leh minor operation 282 an neih hman thu te tarlan a ni bawk.
Tun tum committee-ah hian thu pawimawh tak tak an ngaihtuah zingah Mizoram Health Care Scheme chungchang te, Chawlhbuk (Waiting Shed) siam chungchang te, thawktu confimation chungchang te ngaihtuah a ni a, Dr. John Malsawma, Dy. Medical Superintendent-in Hospital Statistics a present bawk.