Mizoram Presbyterian Kohhran hnuaia Committee sang ber, Synod Executive Committee vawi 284-na, ni thum chhung awh tur chu Synod Office-a JM Lloyd Hall-ah vawiin (Feb. 18, 2020) chawhma dar 10 atang khan a thu tan a, khawpui chhung atangin member 47 leh khawpui pawn atangin member 91, an vaiin member 138 an kal a ni.
Committee hi Synod Moderator Rev R. Lalchangliana’n a kaihruai a, committee member term hmang zo leh lut thar tur inthlakna tihfel hmasak a ni a, Inneihtir theihna kawltu, Board leh Committee danga inthlak ngaite pawh tihfel zui a ni bawk. Synod Secretary-in reports a pe a, Finance Reports ngaihthlak a ni bawk. Synod Secretary Rev. Vanlalrova Khiangte chuan Synod Executive Committee hmasa leh tun inkar-a thil thleng larsar zual report a pe a, kum 2019 Synod Inkhawmpui thurel angin Janaury 11, 2020 khan Bial thar 3 - Tezu Bial, Arunachal & Assam Mission Field East, Laimekuri Bial, Arunachal & Assam Mission Field West, Bhairabkunda Bial (Assam Field) te hawn a nih thu te, January 12, 2020 khan Pastor 86 leh Pro. Pastor 27 te chu dahngheh an nih thu te, February 2, 2020 khan Missionary lak thar 40 te Chaltlang Kohhran Biak Inah tirhchhuah an nih thu te, Serampore College (University) Convocation 2019-in Rev. Rualthankhuma, A/S Barak, D.Mins.; Rev. Lalramchhana, LTC Jabalpore, D.Th. (NT); Pro. Pastor H. Joseph Lalfakawma, Tlabung Zodin, D.Th. (NT); Miss Lalmuanpuii Hmar, Ramhlun Venglai, D.Th. (NT) te hnenah degree thar a pek thu te, SEC hnuhnûng ber (SEC 283 of 28.11.2019) leh tun inkârah Synod Relief Fund atangin Rs. 2,28,000/- sem a nih thu leh Revocation Certificate (RC) mi 86 leh Re-marriage License (RL) mi 67 hnenah pek an nih thu te chu report langsar zualte an ni.
Tun tumah hian thu ngaihtuah tur pawimawh 49 zet a awm a, chung zingah chuan Central KTP Leader & General Secretary ruat thar chungchang te, Mizoram Christian College (MCC) Principal lak dan leh a hlawh tur chungchang te, Synod Social Front Inkaihhruaina enthatna te, Kohhran tê leh harsa zawkte tanpuia dawm chhuah dan kawng zawn rawtna te, Senate of Serampore College (University) hnuaia Theology zir chhuakte zau zawka rawng an bawl theih nana kawng zawn rawtna te, Pastor-a thawk tur ni lova Synod-in Special Ordination pek rawtna chungchang te, Mizo tawng humhalh, vawn him leh hmang uar tura nasa zawka hma lak rawtna te, Kohhran Pavalai Pawl din tan ni zir chian a, enthat leh rawtna te, Mizo hla kan tuipui zualte seng luh a nih theih nan leh hla phuahtu/letlingtuten an siam ang ngeia dah a nih theih nan Kristian Hla Bu ennawn rawtna te, Synod Mission Board hnuaia Contract Missionary-a thawkte dah ngheh chungchang te, Tunlai thiamna hmanga naupai leh fa neih chungchang kaihhruaina chungchang te, Assam Mission Field-a Church Court hawn dilna te, Champhaia Synod Rescue Home din rawtna te, Falkawna Chaplain Quarters leh Khualbuk sak chungchang te, Sikulpui leh Sikul sen hman zui dan tur chungchang te chu a langsar zual an ni.