March 6 - 8, 2020 chhung hian Ramhlun Venglai Kohhran Biak Inah Rorel Inkhawm neih a ni dawn. Rorel Inkhawmah hian thupui ‘Thawh harh a hun’ tih a ni a, speaker atan Rev. B. Sangthanga, Executive Secretary i/c Kohhran Hmeichhia a ni ang.
March 6, 2020 (Zirtawpni) zanah Inlawmna leh Reports inkhawm neih a ni ang a. March 7, 2020 (Inrinni) nilengin Rorel a ni ang a, agenda chhawpchhuah 16 a awm a ni. Zanah vantlang Pathian Biak Inkhawm neih a ni ang. March 8, 2020 (Pathianni) chawhma, chawhnu leh zanah vantlang Pathian Biak inkhawm neih chhunzawm a ni ang a, speaker hnen atangin thupui ngaihthlak a ni ang.
Kohhran Hmeichhe Rorel Inkhawm Vawi 10-na hi Hruaina Eng Channel (LPS & Zonet Cable) ah Live-a pekchhuah thin a ni ang.
Kohhran Hmeichhe Inkhawm Vawi 10-na (2020) Programme Click Here
Bial Chanchin Report Khaikhawmna (January – December 2019) :-
Kum 2019-ah hian Mizoram Presbyterian Kohhran Hmeichhe hnuaiah Bial 201 leh kohhran mal anga zawmtu India ram khawpui liana kan kohhran 4 an awm a, report a lut kim vek thei a ni. Kum 2019 chhunga rawngbawlna tlangpui hetiang a ni :
1. Report lut zat Bial : 201
2. Kohhran mal anga min zawmtu : 4 (Kolkata, Delhi, Bangalore & Mumbai)
Total : 205
3. Kohhran zat : 874
4. Branch Church zat : 96
Total : 970
5. Presbyterian hlang chhungkaw zat : 1,07,636
6. Inawm pawlh chhungkaw zat : 4,541
7. Chhungkua zawng zawng zat : 1,12,177
8. Nitin chhung inkhawm nei zat : 77,152 = 68.77%
9. Buhfaitham tham ziah zat : 1,10,323 = 98.34%
10. Hmeichhe member zat : 1,80,836
11. Kum 2018 aia member punna : 4,233
12. Member tam berna Bial : Ramhlun North Bial
13. Member zat : 2,845
14. Member tlem berna Bial : Buarpui Bial
15. Member zat : 36
16. Hmeichhe inkhawm nei thei vek Bial 182 an awm a, Bial 22 atangin inkhawm thei lo Kohhran/Branch Church 36 an awm.
17. Kum 2019 chhunga buhfaitham hmuh zat belh khawm chu Kg. 1,33,10,095.62grams a ni.
Ni tin chhung inkhawm nei thei hi kum 2018 aiin za zelah 2.9 in an pung a, Buhfaitham tham ziah hi za zelah 1.67 in kum 2018 an khum bawk.
------------------------------------------------------------------------------------------------------------
March 7, 2020 (Inrinni) khan Rorel Inkhawm neih a ni a, Rorel Inkhawmah hian palai 895 (Kohhran aiawh/Palai = 831, Central Commt. Member = 45, Synod Puipate = 3, Central KTP Palai = 2, Pastor/Pro. Pastor = 1, Minister = 2, Upa = 5, Women Centre Superintendent =1, ATTWIM = 5 & Chhimtu = 5) an kal a ni.
Thurel tlangpuite :
1) Kum 2021 Kohhran Hmeichhe Inkhawmpui Lian chu March 12 – 14, 2021 chhungin East Lungdar Kohhranah nghah a ni ang a, kum 2022 Mizoram Presbyterian Kohhran Hmeichhe Rorel Inkhawm chu Mission Veng Kohhran Biak Inah nghah a ni ang. Kum 2023 Kohhran Hmeichhe Inkhawmpui Lian chu Darlawn-ah nghah a ni ang a, kum 2024 Kohhran Hmeichhe Rorel Inkhawm chu Dawrpui Kohhran Biak Inah nghah a ni thung ang.
2) Kum 2020-21 Inkhawmpui Lian Budget atan hetiang hian pawm a ni. Central Budget : Rs. 15,00,000/-, Women Centre : Rs. 27,00,000/- Total : Rs. 42,00,000/-.
3) Synod Hospital, Durtlanga Paediatric Ward NICU-a hman tur Neonatal Ventilator lei rawtna chu pawm a ni a, Central Committee lo bawhzui tura dah a ni.
4) Ram pum huapin awmni khama ram tan sual thupha chawia tawngtai ni se tih a ni a, Central Committee-in a hun leh a neih dan turte ruahmanna an lo siam ang.
5) Ram chhung leh ram pawn a zirlaite tana tawngtai tih leh pawngsual leh hleilenna laka hmeichhiate leh naupang te kan him theih nan thla thar tawngtai thupuiah telh ni rawh se, tih chu pawm a ni.
6) Central Kohhran Hmeichhiain ‘Naupang zinga rawngbawlna’ tih Seminar a neih bawhzui nan, naupang enkawl lai neite tel theihna tur ‘Chhangchhe Pual Inkhawm’ neih tha tih a ni a, Central Committee-in ruahmanna lo siam rawh se tih a ni.
7) Women Centre compound remchang laiah Kraws lian phun tura rel a ni a, Central Kohhran Hmeichhia te’n hma an lo la ang.
8) Synod Hospital, Durtlang leh John Williams Hospital, Lunglei pualin Thawhlehni zan vawihnih inkhawm thawhlawm lak khawm ni se tih a ni a, Central Committee-in Hospital pahnihte mamawh ngaihtuah chungin a pek zat tur ruahmanin lo pe se tih a ni.
9) Pathian thu zir hmeichhiate nemngheh an nih a, rawngbawlnaah tangkaia hman an nih ve theih dan kawng zawn ni se, hmalak dan tur Central Committee-in lo ngaihtuah se tih a ni.