March 15, 2020 (Pathianni) hi Mizorama Chanchin Tha thlen Ni champha a ni a, Kohhran hrang hrangah special programme-a hman a ni ang a, Pathianni chawhnu leh zanah te thupui inang tlang zir tura tih a ni.
Chawhnu thupui : "A chanchin la hrilhna ngai loh mite hnenah", Rom 15:17-21
Zan thupui : "Ka thuhretute in ni ang", Tirh 1 :7-8, Thup 2:10
Mizorama Chanchin Tha thlen Ni atana kan hman tak, March 15 hi Mizorama Chanchin Tha rawn puang hmasa bertu Rev. William Williams, Mizorama a rawn thlen Ni champha a ni a. Rev. William Williams hi Khasi rama Welsh missionary a ni a, Mizote chanchin a hriatin Mizote zinga Chanchin Tha hril a duh hle a, Mizote zingah missionary ni tura alo kal thei lo chungin Mizoram tlawh hram a tum a, Silchar D.C remruatpuinain Sipaiho ruala lo kalin Mizoram a rawn lut a, a hmasa ber atan Mizote zingah Krista Chanchin Tha a rawn puang ta a. Rev. William Williams-a'n Mizoram a rawn thlen Ni hi Mizoram Presbyterian Kohhran te chuan Mizorama Chanchin Tha lo thlen Ni atan a hmang ta a ni.