Rev. Thangpuiliana (kum 90) pensioner chu tukin (March 20, 2020) zing dar 4:19 khan a Aizawl Hospital-ah a thi a, chawhnu dar 1:00 hian Chaltlang Kohhran Biak Inah Synod Moderator Rev. R. Lalchangliana’n a vui ang.

Pian leh mûrna:

Rev. Thangpuiliana hi July 1930-ah Mualphêng khuaah a piang a, a pa chu Dochhûnga a ni a, a nu chu Chhanzovi a ni. Ni 25.5.1961-ah Lalchhuani nên an innei a, fa 6, mipa 3 leh hmeichhia 3 an nei a ni.

A pa chu lal upa, zu in mi a ni a. A nuin Kristian nih a dil pawhin a phal lo va, “Zu i sak a la ngaih dâwn avangin a rem lo,” a ti tlat a. Rei tak a damloh hnuah a phalsak ta a. A thih dâwn zanah, “Vântirhkoh thla nei, a vara inchei kan inah tunah hian an lo khat ta tlat mai a, min hruai tûr an ni e,” a ti a, a pasalin, “I zam e lo?” a tih chu, “Zam lo ve” tiin a chhâng a, a thi zui ta mai a. Chumi hnuah chuan Isua a ring ve ta a. An lalin, “Zu mi zûk dâwn loh avangin Rs. 40/- i chawi tûr a ni,” tiin a thing a. Chumi avang chuan Kristian lal Dorâwta khua Saitualah an pêm ta a. Hetih hun lai hian Rev. Thangpuiliana hi kum sarih mi a ni tawh a, Saitualah hian a seilian ta a ni.

Mualphênga an awm lai hian se chhun khuangchawi ni khuaa zu leh sa ti lo tûra inserh mi pathum zingah a tel ve a. Hei hi Pathian buatsaihna niin a ngai hial a ni. Saituala an pêm hnuah pawh Sande Sikul leh kohhran inkhâwm a dam chuan a thulh ngai lo. Fianrialah hmun remchang a hmuh phawt chuan a hmang ziah a, ni khata vawi thum aia tlem lo fianrial nei tûrin a intiam zui a, eng emaw chen chu a hmang thei a ni. 

A Hun hmasa lam:

Mizo High School, Aizâwlah pâwl kua a zir lai, 1949 April thlaah pianthar harhnain a nuai a. A thianpa Lalchâma nên tui chho zêlin an zirna pawh an hlamchhiah a, an fail chiang hle a ni. Rev. Samuel Davies, missionary senior lehkha kengin Baktawng Bial lamah kualin khaw 7 zet fang kualin Saitualah a lût a. Rev. Samuela rawtna angin a kum leh Synod-ah Theological Skul Aizâwla zir an rêl ta a. Tirhkoh Thangzâwna 1949-a an lâk tumin dil ve a tum a, Rev. Samuela chuan, “Sâp ramah tlangvâl pakhat hian Pastor hnênah, ‘Tlangvâl, va haw leh ta la, kum hnih a ral hnuah i la duh a nih chuan i lo kal leh dâwn nia,’ tiin a hrilh,” tih thu chiahin a lo chhang a, ‘mi va ngainêp e’ ti rilru chungin Banglapui atang chuan a haw leh ta a. 1950-a Pathian thu zirna remchâng a awm tâkah chuan a chhûngte remti chiah lo chung a dil ve ta a. Lâk a nih hnuah Kohhran Committee chuan a chhûngten an remti zân lo tih an hriatin Khâwmpuiah mualpho an hlau deuh va, mahse ani chuan, “Hei chu Lal thu a ni a, ka chhûngte dâl chi a ni lo,” tiin a chhâng a.

Zirna lam:

Kum 1951 March 13-ah mi dang pahnih Lalchâma leh Thansiama te nên Mission Vêng Biak In Vestry-ah Theological Sikul chu an kai tan ta a, Banglapui kudamah an riak mai thin. Heta an zir lai hian Serampore matric an pass a, 1954-ah Cherra Theological College-ah L.Th. zirin Thansiama leh Sâpbawia te nên an kal a, 1956-ah zovin Lalrûma te nên a rualin an rawn chhuak a ni.

Rawngbawlna:

Synod-in Standing Committee kuta a lo dah angin July, 1956 atanga Pro. Pastor hna Sialsûka thawk tûrin a ruat a. 1958 June 29, Pathianni zingah Special Synod-in Dawrpui Biak Inah a nemnghet a. Pro. Pastor-a a luhpui 3-te nên nemngheh an ni. Sialsûk Bialah awm zui nghâlin kum sawm hnih pahnih leh a chanve a awm a ni. 1977 Synod, Chanmari-ah kum bi thliahin kum 10 tih a ni ta a. 1964 khân Durtlângah Hospital Chaplain-in kum chanve Dr. Nghâkliana hun lai khân a awm a ni.

Kum 1978-a Chaltlâng Bial hawn thar a nih khân a vawng zui nghâl a. Hetih hun lai hian kohhran pathum Chaltlâng, Zemabâwk leh Bâwngkâwnte a bial a, kum 11 a awm. A awm chhûng hian Kohhran 10 a ding hman a ni. 1989-ah Durtlâng Bialah sawn a ni a, kohhran 6 a enkawl a. Durtlâng Biala a awm lai hian a thawh hun chhûng kum hniha pawhsei sak a ni a, 1993-ah a châwl ta a ni.

A thawh chhûng hian mi 6115 baptisma a chantir a, nupa tuak 807 a inneihtir bawk. Synod Moderator-ah (1981-1982) a tang tawh a, Presbytery Moderator-ah vawi 4, Bial Chairman-ah vawi 15 a tang tawh bawk. Synod Moderator Office a hranga neih hnuah a luah hmasatu ber a ni. 

Kohhran a hnu hma neih dangte:

Kum 1953 vêk hian Rev. O.W. Owen te nupa an lo chhuak a, a hovin Student Christian Movement din a ni a. College a la nih loh avangin Student Christian Association tih a ni. Rev. Thangpuiliana hi Secretary hmasa ber a ni. A kum leh 1954-ah Teachers’ Training Hall-ah Rev. Owen-a ho bawkin Kristian Thalai Pâwl hi din a ni a. Upa Chawngzika leh Pu C.Z. Huala te pahnih chu a tel zinga a upa zual deuh chu an ni a. Pu Lalthankima pawh a bul tumtu zinga mi a ni. 

Ram buai avanga kohhran pâwl hrang hrang Presbyterian, Baptist, Roman Catholic, Seventh Day Adventist, Salvation Army, Maraland Evangelical leh United Penticostal Church hruaitute Committee din tula hriain Rev. Lalsâwma nên Lt. Governor an va râwn a, tha tihpuiin Mission Vêng Biak In Vestry-ah May, 1982-ah lungrual takin an din ta a, a hmingah Kohhran Hruaitute Committee (Church Leaders’ Committee) vuah a ni a. Tunah chuan Mizoram Kohhran Hruaitute Committee (MKHC) tih a ni. Kum thum (1982-1984) chhûng Chairman hna a chelh a. Theological Education Board-ah kum 16 telin Moderator a nih kum leh a dawt kumah Chairman a ni (1981-1983). Sialsûka a awm laiin High School Chairman-ah kum 13 zet a tang bawk.

A thawh chhûng hian Biak In paruk a hawng a, Kohhran hall 1, Kohhran in 1, Presbytery thar 1 (Tawi) leh Pastor Bial thar 1 a hawng a, Biak In lungphum vawi li a phûm bawk. 

A pension hnu hian All Mizoram Farmers’ Union (AMFU)-ah telin Executive Member a ni. Public Relation and Co-ordination Committee Chairman (1997) a ni bawk. 

A hun hnuhnung:

Amah hi a kum a upat lamah lung lam natna leh zun thlumin a tlakbuak ve tak avangin a taksa pawh a lo chak lo ve tial tial a. Kum 2006 leh kum 2015-ah pacemaker te vuah a ni a. Kum 2019-ah Aizawl Hospital-ah admit niin tlema a zia chhoh hnuah in lama enkawl turin lakchhuak a ni a. In lamah hun rei tak enkawl a ni a. Kumin February thla tawp atang khan khum betin a awm ta a, March 15, 2020 atang khan Aizawl Hospital ICU-ah dah luh a ni a, March 20, 2020 zing dar 4:19 khan a thi.

VUINA PROGRAMME

A hmun : Chaltlang Kohhran Biak In
A hun : Ni 20.03.2020 (Zirtawpni); 1:00 p.m.

Vuitu : Rev. R. Lalchangliana, Moderator, Mizoram Synod
Hlasak ho : Ka Lalpa duh tak, min awmpui ang che (KHB No. 265)
Chanchin sawi : Rev. Vanlalrova Khiangte, Secretary, Mizoram Synod
Zaipawl : Chaltlang Kohhran Zaipawl
Thlamuanna Thuchah : Vuitu
Tawngtaisakna : Rev. J. Lalremsiama, Statistician
Zaipawl : Chaltlang Bial Zaipawl
Hlasak ho : Lalpan a hmangaihte ram a buatsaih chu (KHB No. 498)
Malsawmna : Rev. Lalramliana Pachuau, Finance Officer, Mizoram Synod

Thlanmual : Rev. Lalbiaknia, Bialtu Pastor