Nimin (May 14, 2020) zing khan Mizoram Presbyterian Church Synod Puipate Thukhawm (OM) chuan Rengdil leh Zamuang, May 12, 2020 -a rial leh thlipuiin a nuai avanga chhiat tawkte tanpuina pek dan tur a rel a. A bialtu MLA hnen atangin sawrkar-in rangva a pe dawn tih hriain chumi nena tangkawpa an mamawh lamna tur pawisa fai pek a rel a. Khawtlang tak meuha chhiat tawk an nih avang leh in chhia Rengdil-ah 211 (a tira report 202 aiin a lo tam hret a) leh Zamuangah 219 (atira 212 kha an chhiar nawn a, chhiar nawn leh an la tum) lai a nih avangin Synod Budget-a Relief head-ah in tin mamawh tak tak pek tur a awm seng dawn lo va. Hetih lai hian Covid 19 do tanpuina, chhuanchham tur chhawm chhuahna, khuarel chhiat tawk khaw dang dang lo tanpui tawhna te nen Rs Nuai 30 dawn lai sem chhuah tawh a lo ni bawk nen, tam thamin chang dawn lo mah se mipui harsatna hriatpuiin Mizoram Synod-in a tuarpui tih lantir thuai tul a ti a.
Hemi ni la la hian Rev. R. Lalchangliana, Moderator, Rev. K. Lalrinmawia Exe. Secretary, Pu Lalanpuia Synfo Staff leh Pu K. Lalchhuanmawia Gen. Adm. Staff te an tlan thla nghal a. Rengdil-ah hian Bialtu Pastor Rev. Zomuansanga Chhangte kutah khawtlanga chhiat tawkte tanpui nan Rs 4,50,000/- (Nuai li leh singnga) an hlan a. Pastor hian VC President leh VLTF Chairman ni nghal kutah Synod hruaitute awmlai la la hian a hlanchhawng nghal a ni.
Chutiang bawkin Zamuang-ah an kal nghal a. Bialtu Pastor Rev. F. Lianthangpuia kutah Rs 4,50,000/- bawk an hlan a. Ani pawh hian VCP leh VLTF Chairman ni nghal kutah, Synod hruaitute awmlai la la hian a hlan leh nghal bawk. Synod hruaitute hian Rengdil Hmuntha Veng Biak In chung rialin a den chhiat nasat dan a hmunah an en nghal a; Zamuangah pawh Zamuang North Biak In chung leh Presbyterian English School (PES) chung rangva a denchhiat dan a hmunah an en nghal bawk.
Synod hruaitute hian Tuidam khuaah rial avanga in chhia 4 a awm thu a hrechawp a; tanpuina pek dan tur an ruahmanpui nghal a. Bialtu Pastor hovin in 4 te hian Synod Relief rate pangngai angin an lo hlan ang. Synod hruaitute lam kal hi an tlawh khuaa Kohhran Upa ten lo dawngsawngin an lo tawiawm nghal zel a, an lawmin thlamuanthlak an ti hle.