Mizoram Synod chuan vawiin (May 21, 2020) chawhma dar 11 khan Pu Nela Sunna hun J.M. Lloyd Hall, Synod Office-ah an hmang.
Sunna inkhawm hi Rev. R. Lalchangliana, Synod Moderator-in a kaihruai a, Rev. Vanlalrova Khiangte, Secretary (Sr.) hnen atangin a chanchin ngaihthlak a ni. Rev. Lalramliana Pachuau, Finance Officer-in Sunna hun leh tawngtaisakna hun a hmang a, Rev. C. Lalremruata, Kulikawn Bialtu-in malsawmnain inkhawm a tin a ni.
Pu Nela sunna hunah hian Synod Puipate, Synod Office staff thenkhat te leh sawm bik mi thenkhat an tel a ni.
REV. BRUCE TENNYSON NELMES CHANCHIN (1931 -2020)
Rev. Bruce Tennyson Nelmes (Pu Nela) hi August 26, 1931 khan Wales ram khaw pakhat Llantrisant-ah a piang a. A pianna khua hi Cardiff khua atanga mel 10 vel leka hla a ni a. A thiante chuan ‘Bruce’ tiin an ko thin a. Missionary lo chhuak hmasate ang lo takin Science thiamna nei a ni a. Master of Science degree nei (Mechanical & Electrical Engineer) a ni a, hla leh rimawi ngaina tak a ni bawk.
Pu Nela te unau hi pathum an ni a, amah hi a naupang ber a ni a, farnu pahnih a nei. A farnu pakhat chu nausen laiin a thi a, pakhat dang Betty chu Caldicot, Newport bulah chengin, August thla hian kum 93 a tling ang. Pu Nela hian Scientist hmingthang tak thianpa, John Bowen a nei a, ani nen hian thlawhna chi dang deuh hmuh chhuah tumin an bei nasa hle a. An thian dun hian Britain ram mite hriat hlawh tham an ni a. Mahse, Pu Nela chuan Pathian kohna a dawn avangin UTC, Aberystwyth-ah BD a zir ta zawk a ni.
A thianpa Dr. Phillips-a sawi danin, Pu Nela'n Pathian thu a zir dawn tih chu mi zawng zawng hriat a ni hial ang tih khawpin sawi a hlawh a. UTC, Aberystwyth-a zir lai huna zirtirtute pawhin an ngaihdan/hmuh dan an sawi fo chu – ‘thiam thei tak, pakhatna ni tluan zak’, tih a ni thin.
Kum 1959-ah mission hna thawk turin Oswestry-ah lak a ni a. Swansea (Rev. Dr. H. Sangkhuma te awmna thin) hmar chhak lam mel 7 vela hla Neath khuaah sawn a ni a, October 1, 1959-ah Pastor atan nemngheh a ni. Mizorama a lo chhuah dawn hian, Rev. Zairema Sapram atangin a lo haw dawn lai tak a ni a, Pi Zaii (Miss Katie Hughes) chawlh (furlough) la mek, Mizorama a lo kir leh hun nen a innang bawk a, November, 1959-ah an lo chhuak ho ta a ni. Pu Nela hi a nupui Sonia leh an fapa nen an lo chhuak a ni.
Hetih lai hi Pu Awna (Rev. Owen W. Owen) Saprama a kir hlim a ni a, Mission hna thawktu indaih loh lai tak a ni a. Pu Nela hi Science lam leh khawl lam chinchang hria a ni bawk a, a hna hmasa ber chu Mission Press-a electric khawl hmanga hnathawh a ni a. Mission Press lamin nasa takin hma a sawn phah a, a hnen atang hian mi dang pawhin electric khawl hman dan leh a enkawl dan an thiam phah a ni. Mizoramah hian Pastor hna leh Missionary hna a thawk kawp a. Kulikawn Kohhran viltu bik deuh a ni a, Kulikawn Pastor te pawh an ti thin awm e. Kum khat hnuah Theological College-ah zirtir hna a thawk leh a. Theological College pawhin hma an sawn phah nasa hle a ni.
Pu Nela awm lai hi Mautam lai a ni a, a hnuah Zoram pum Tampui mitthiin a tuam zui leh a. Mirethei ei tur nei lo mangangte a khawngaih thei hle a. Nasa takin chhawmdawl hna a thawk thin a. Mizorama rei lo te a awm chhung hian a zin nasa hle bawk a, Thingtlang khaw tam tak a tlawh a, Champhai chhak Burma ram hrul thlengin a han fang hman a ni.
Haflong lamah Mission hna thawktu an awm loh avangin August, 1961-ah koh thlak a ni a. Thahnemngai takin Halflong Mission Field a enkawl laiin chhungkaw lam harsatna avangin December, 1961-ah Sapram lamah a haw thla leh ta a ni. Halflong-a a rawngbawlna hi a ram miten an hlut hle a, ama hming chawiin sikul tha tak, The B.T. Nelmes English School an din nghe nghe a ni. Saprama a haw hnu hian Hymac Company-ah a thawk a.
Hymac Company hi lei laihna khawl (earthmover, JCB kan tih ang chi) siam chhuaktu hmasa, khawvela lar tham a ni a. A tirah chuan hna thawh tur ruahmantu ber (draughtsman) angin a thawk a, khawl thar duan chhuah (designing) a thiam bawk avang leh hna a thawh that avangin a kaisang chak hle a. Britain leh Scandinavia lamah te hna thawkin a zin kual nasa thei hle thin.
Kum 1978 khan hun puma Pastor hna thawk turin rawih leh a ni a, Pontyclun khuaa Kohhran 5 lai enkawl tura tih a ni a. A rawngbawlna Pathianin mal a sawm a, hmun tam takah Kohhran a tlak hniam laiin a enkawl Kohhranah chuan member an pung tual tual thung a. Thalaite zinga rawngbawl hi nuam a ti em em mai a, Thalai rawngbawlna (Youth Ministry) hrang hrangah hlawh nei lova rawngbawl turin a inpe bawk a. Pontyclun-ah hian a rawngbawlna a nung tha a, thalai tam takin Kohhran an belh leh phah a ni.
Glamorgan Polytechnic College (tuna University of South Wales ni ta)-ah Lecturer hna a thawk leh bawk. College lecturer hna thawk chungin Open University-ah a inziak lut tha leh a, Honours degree leh Master degree a dawng kawp nghe nghe a ni. Heti chung hian a rawngbawlna a thlahthlam ngai chuang lo.
Haflong atanga Saprama a haw takna chhan kha a nupui nena an inkar fel loh vang a ni a, an inthen ta nghe nghe a. A nupui Sonia nen hian fapa pahnih an nei hman a. A hnuah Pastor fanu Jennifer a nei leh a. Jenny hi zirtirtu hna thawk thin a ni a, an fapa neih chhun Richard-a hi music lama tuimi a ni a, Music-ah research bei mek a, studio lian tak a nei bawk. Richard-a nupui Angela hi medical doctor a ni a, fanu pahnih an nei.
Kum 1989-ah vanduaithlak takin Pu Nela hian lung natna neiin heart attack nasa tak a nei hlauh mai a, dam chhuak zo lo tura ngaih hial a ni a. Doctor-te an beidawn avangin in lama inenkawl mai turin an ti a. A dinhmun dik tak hi Pu Nela nupui chauh an hrilh a. A nupui Jenny sawi danin, “Min la dampui zel theih nan Pathian hnenah lung thar pe turin ka dil ngat ngat a. Ka dilna chhanin a awm a, kum 31 zet a nunna pawhsei a ni ta a. A dinhmun hre chiang em emtu daktawr (General Practitioner) chuan Bruce-a hnenah, ‘Pathian nen hian in inthlunzawm tha bik em a nih hi’, a ti ringawt mai”.
Pu Nela hi a hming dik tak Nelmes tih lamtawiin Mizo ten Pu Nela tiin an ko nghal mai a. A Mizo hming hi a inhmeh ta phian a. Pa nelawm tak a ni a, lemziak thiam tak a ni bawk a. Thlarau mi, zai ngaina, Pathian thu lama tui em em a nih avangin Kohhran hote ngainat a hlawh a, Mizo thian tha tak tak a nei hman a ni. January 3, 1961 khan Serkawn Baptist Biak Inah Rev. C. Pazawna leh Nl. Biakchhingi te inneihnaah mopa thianah a tang a. Sap Missionary inneih thiana hmang an la awm ngai loh avangin miten mak an ti hle. Rev. C. Pazawna nen hian an inkawmngeih hle a, Saprama Pathian thu zira a zu kal leh pawh khan an inthian tha zui ta zel a ni.
Mizoramah a awm rei lo na a, a Mizo tawng thiam chhun a thiam nalin a lam dik em em a, Mizo hlate pawh a hre bel hle a ni. Saprama a haw thlak hnuah a chanchin hi hriat tur a tam em em lo va. Kum 1994 Gospel Centenary lawmnaah khan Zosap dangte nen an lo chhuak a, a hnu lamah Mizoram a rawn tlawh ta lo. Rev. Dr. H. Sangkhuma te nen hi chuan an inbe pawpin an intlawh tawn fo a, an inkhawm ho zeuh zeuh bawk. Rev. Sangkhuma chuan, “Pu Nela kha Thlarau mi, Revivalist, Evangelical lam awn a ni a. Pa fiamthu duh tak a ni bawk a, mi rawn biak chang te hian fiamthu a thawh nasa thei thin”, tiin a sawi.
Kum 2005 May thlaa Rev. Lalhmangaiha hova Central Kristian Thalai Pawl hruaitu thenkhat leh zaithiam ten Wales an tlawh khan Pu Nela hi an tlawh chhuak a. Rev. Lalnunzira Bungsut khan, 2016 May thlaah USA atanga a lo haw pahin a tlawh bawk a. Kum 2018 July-ah Synod Moderator Rev. F. Lalrinnunga leh Senior Executive Secretary Rev. Lalramliana Pachuau te P.C. Wales General Assembly hmanpuia an zu zin khan an tlawh bawk a ni. Anni hi Mizoram atanga zin, Pu Nela tlawhtu hnuhnung an ni ta awm e.
Pu Nela hian Mizote a hmuh remchan a piang a zaipui deuh zel emaw tih tur a ni a. Rev. Dr. H. Sangkhuma nupui Pi Lalrintluangi kha, October, 2015-ah Pu Nela lawina Kohhrana Harvest Thanksgiving Service-a an inkhawm tumin inkhawm banah a zaipui a, “Khawvel hi bo mah se”, tih hla an sa dun a. (An zai lai video pawh hmuh tur a awm nual kha). Pu Rinnunga leh Pu Rama te pawh kha,“Lal Isua kan thian tha berin”, tih hla a lo sakpui a ni. KHB. No. 23-na “Kan Pathianin min hruai zel thin”, tih pawh hi a hla duh berte zinga mi a ni.
St. Cenydd Presbyterian Kohhran, Caerphilly-a lawi a ni a. A lawina Kohhranin Pastor an neih loh avangin lawmman beisei miah lovin a pui thin. Bible zir, Harhna, Tawngtai, Damlo tlawha Lalpa zanriah Sakramen theh te a ngai pawimawh em em thin a. A lawina Kohhran pawhin an ngaina em em a ni. Pu Nela hian a dam lai ngeiin Wales ramah leh Mizoramah harhna nasa tak thleng leh se a ti hle thin a ni.
Pu Nela (89) hi tun hnai khan ama inah tlu sualin na takin a lu a sawh a, nikhaw hre lovin a awm zui ta a. Royal Glamorgan Hospital, Cardiff bulah enkawl a ni a. A thluaka thisen lut chu an dan theih loh avangin May 3, 2020 (Pathianni) zan dar 9:00 (India ramah May 4, zing dar 2:30) khan chatuan ram min pansan ta a ni. Pu Nela thih thu hi Rev. Dr. Sangkhuma (Wales) chuan Mizoram Synod hotute a rawn hriattir a. A vui hun tur hi ngaihchan reng a ni bawk a. Mahse, puangzar lovin, anmahni chhungkua tein an lo vui liam ta a ni.
A nupui Jennifer Nelmes chuan a pasal chanchin leh an vui liam dan heti hian a sawi –
Kan fapa Richard-a nen hian amah kaltlangin malsawmna kan dawng nasa em em a. Kan tan a inpeih reng a, min kaihruai a, amah atangin thil tam tak kan zir chhuak a ni. Rinna nghet tak nei mi a ni a, thuhnuairawlh tak a ni bawk a, a hlawhtlinnaah pawh chawimawi a duh ngai lo. A zaidam em em a, ‘Gentleman’ an tih ang dik tak hi a ni. A inngaitlawm em em a, India rama a rawngbawl laia mite zah kai a nihna leh mite hmangaihna a dawn zozaite kha mak a ti thin a. Dik nia a hriat chu a dinchhuahpui mai a, inpho lansarh a tum ngai miah lo va. Pathianin a hruaina apiangah a kal mai a, Pathian mi (God’s man) dik tak a ni a, ka ngaisang em em a ni.
Bruce-a hi inah a tlu sual a, a thluakah thisen a tling a, nikhaw hre lova rei tak a awm hnuah, May 3 (Pathianni) khan thlamuang takin min chawlh hahdamsan ta a ni. Mi dang tihbuai duh lo mi a ni a, amah kan vui liam hma loh chuan a thih thu hi mi dangin hre miah lo se a duh nghe nghe a ni.
Ama duhthusam ang ngeiin, May 12 khan mawl tea vui liam a ni a. A kuang chu a rawngbawlnaa a bah thin puanin kan khuh a, hei hi Pathian kohna chhanga a rawngbawlna thin Mizoram leh Assam ram mipuite a hmangaihna lantirna a ni. Invui dan pangngai ang lovin chhungkua tea vuiliam a duh avangin thlanmualah pawh kan fapa Richard-an a vuinaa thu chhiar chhuah tur a pain a lo pek lawk chu a chhiar ta a ni, tiin.
May 12, 2020 (Thawhlehni) tlai dar 4:00 (kan ramah zan dar 9:30) khan kan Zosap nelawm leh inngaitlawm, Pathian kohna chhanga khawvel ropuina kalsana thahnemngai taka rawngbawltu Rev. Bruce Tennyson Nelmes (Pu Nela) chu ama duhthusam angin, tlawm taka vui liam a lo ni ta a. A lei taksa chu Babell Presbyterian thlanmual, Llantrisant, South Wales-ah Thawhlehna nghakin zalh a ni ta. Kan Zosapten mual min liamsan zel a, tunah hian Pi Zopari (Angharad Roberts) leh Pu Zawna (Rev. B.E. Jones) nupui Pi Zawni (Margaret Jones) te chauhin min la dampui a ni.
For more pics Click Here
Compiled by Upa Zonunmawia