SIKULSEN an tih mai thin Govt. Boys’ Primary School kha Rev. D.E. Jones, Mizoten Pu Zosaphluia kan tih khan a pianchampaphak vawi 28-na  lawmna ni pahfawmin February 15, 1898-a a hawn tan kha a ni a. Pu Rai  Bhajura te nupa nen an hun tam ber sengin an enkawl thin a ni. Rev. Edwin Rowlands (Pu Zosapthara) chu Mizorama missionary hna thawk turin December 31, 1898-ah Aizawl a lo thleng ve leh a, Chanchin Tha hril bakah Sikul lamah a  hun tam ber chu a hmang a. Zing dar 8:30 atanga tlai dar 4:30 thlengin Sikul hi an kai thin a ni. A tir lamah chuan ziak leh chhiar an zir deuh ber a, Bible thu te leh Thu Inchhang te pawh an zir tel thin. Pu Zosapthara kutziak hi a mawi hle a, Sikul naupangten an entawn ber a ni ta a. Kum 1900 kum thar atang chuan Pu Zosaphluia (Rev. D.E. Jones) chu thla thum lai Pathian thu hrila Chhim bial lama  a thang bo leh dawn avangin Sikul enkawlna chu Pu Zosapthara kutah a hlan a. Chuta chin chu Pu Zosaptharan Aizawl a chhuahsan ni, August 25, 1908 thlengin mawhphurtu zawk chan changin a enkawl ta a ni.

Sikulsen Head Teacher hmasa ber (15.2.1898 - 31.12.1989) chu Pu Zosaphluia a ni a, Head Teacher pahnihna (1.1.1900 - 25.8.1908) chu Pu Zosapthara niin pathuma (1909 -1923) Pu Chawnga a ni.

Kum 1901-ah Pu Zosapthara chuan enchhinna atan Thingtlang khaw  pathum - Chhingchhip, Phulpui leh Khawrihnimah te Sikul (Experimental) thla thum chhung atan a hawng a. Heng Sikul pathum hawn thara thawk tur hian Pu Tawka chu Chhingchhipah, Pu Chawnga chu Phulpuiah, Pu Thanga chu Khawrihnimah a dah a ni.

Kum 1902-ah Aizawl khaw chhungah Sikul panga - Maubawk, Mirawng Veng, Venghlui, Thakthing Veng leh Hriangmualah te hawn a ni leh a. Venghlui, Thakthing Veng leh Hriangmuala mite hi Hmeichhe  tan bika hawn an ni a. Pi Nu-i, Pi Pawngi leh Pi Saii te chu zirtirtu atan ruat an ni.

Kum 1903, June 25 khan Lower Primary Scholarship Exam hmasa ber neih a ni a. Hetih laia Lower Primary School hi Pawl 1 atanga Pawl 4 thleng a ni a. Mission School atanga exam mi 13-in tha takin an pass vek a, mi 5-in Scholarship thla tin cheng 3 Sawrkar atangin an hmu a. Upper Primary Class (Pawl 5) an zawm nghal a ni. Kum tinin Lower Primary Exam hi buatsaih a ni ta a. Upper Primary (Pawl 6) Exam hmasa ber chu kum 1905-ah buatsaih a ni.

Sikulsen (Govt. Boys’ Primary School) hi February 15, 1898-a hawn tirh chuan Pu Zosaphluia chenna in bathlarah an zir tan a. A chenna Banglapui hi tuna Synod Senior Executive Secretary-in a luah tak kawtah hian Râp In-a sak a ni a. Chumi hnuah Synod Press bul Pu Zosaphluia Building din takna sir thlang lamah sak a ni ta a. Sikul tha tak, a chhuat pawh Herhse ril thingphel, inches 4-a hlai hman a ni a. Chu chu Mission Veng Biak Inpui neih a nih hma chuan Biak In atan pawh hman nghal a ni a. He Sikul sakna hi Mizorama Sipai hotu lu ber Col. Loch Sap (Lt. Col. G.H. Lock)-in a pek a ni.

Kum 1904 February thla khan Assam Chief Commissioner, Sir Joseph Bampfylde Fuller chuan Zoram a rawn tlawh a. Pu Zosaptharan Mission Sikul a enkawl that zia a rawn hmuhin a lawm em em a. Hetih lai hian Lungleiah te, Tlabungah te leh Aizawlah te Sawrkar Sikul a awm ve nual a. Bawrhsap nen inrawnin, Mizorama Sikul zawng zawng chu Mission kuta dah an rel ta a ni. April 1, 1904 atang chuan Sawrkar Sikulte chu titawpin Welsh Mission kutah Sikul enkawlna chu a awm ta a ni.

Pu Zosapthara chu Mizoram puma Sikul hotu lu ber, Honorary Inspector of Schools atan Sawrkarin a ruat ta a. Assam Chief Commissioner, Sir Bampfylde Fuller chuan Sikul sakna atan pawisa a pe a, chu pawisa chuan Aizawlah leh Lunglei Serkawnah, a lenzawng leh a pindan awm dan te, a sakna hmanruate pawh inang chiahin Sikul sak a ni ta a. Aizawla mi chu Sikulsen (Govt. Boys Primary School) tia hriat tak hi a ni a. Sikulsen hi kum 1905/1906- ah luah tan a ni. Sikul hlui Pu Zosaphluia Building sira mi chu Hmeichhe Sikul atan hman a ni a. Kum 1948 velah he Sikul hi thiah a ni a, a insakna thawmhnaw hluite chu lilam a ni a, Welsh Mission Driver hmasa ber Pu R. Vankunga (tuna Sikulpui Headmaster Upa Zonunmawia pa) chuan a lei a. Tun thlenga an chenna in chhuat hman lai hi a la ni.

SIKULPUI - GOVT. BOYS’ MIDDLE SCHOOL hi kum 1907 June thlaah hawn a ni a. Chumi chu Mizo leh Vai Chanchin Bu, July, 1907-a chhuakah Pu Zosaptharan heti hian a ziak a ni:-

SIKUL THU - MIDDLE ENGLISH : June thla a’n chuan Aizawl skul- puia Middle English Pawl an lo shiam ta a. Mizo paruk, Saitawna te, Ngaithangvunga te, Khianga te, Saptea te, Kawlhuma te, Lianhmingthanga  te nen an tel. Middle English ruat hi kum 2 chhunga zir tur a ni. Middle English chhuak-a hnu-zawng-in khawi- Skulpui-a sap tawng hmang zawk-in an zir peih turin an bei-shei. Lower Primary kum 4, Upper Primary kum 2, Middle English pawh kum 2 an ruat. - Zosapthara

Pu Zosaphluia Autobiography, Rev. Dr. H. Vanlalauva lehlin leh Pu Zosapthara chanchin Rev. Dr. H. Vanlalauva ziak atang te, Upa Chalhnuna leh Upa Chawngzika te kawmna atanga an thu dawn atangtein Sikulsen leh Sikulpui Joint Staff Meeting dated 30.8.2000 chuan Sikulsen (Govt.  Boys’ Primary School) din tanna chu 15.2.1898 a ni tih leh Sikulpui (Govt.  Boys’ Middle School) din tan chu 1.6.1907 a ni, tiin lungrual takin an pawm tlang a. Kum 2007 khan Sikulpui kum 100 tlin chu ropui takin an lo lawm tawh nghe nghe a ni.

SYNOD-IN A LAK LET LEHNA KAWNG : September 1,1952 atanga May 29, 2019 (kum 67 vel) chhung Sawrkar enkawlna hnuaia awm tawh, Sikulsen leh Sikulpui chu Mizoram Presbyterian Kohhran mipuite chuan lak let leh duhna thinlung an lo pu leh ta a, kum 2010 Synod Inkhawmpui thurel General 33-na chuan, “Sikulpui (Boys’ Primary School leh Boys’ Middle School) hi Synod-in la let leh rawh se”, tiin a lo rel a. Chu thurel bawhzui chuan Executive Secretary i/c Education, etc. Rev. Zosangliana Colney chuan Mizoram Sawrkar-ah point 5 ziakin ngenna a thlen a.

Sawrkar lamin thu an ti tlu mai thei lo nge, he kan ngenna hi chhanna kan hmu mai lo va, keini lam pawhin kan bawhzui na lutuk lo bawk nen a reh zui ta vang vang a. Kum 2017 a lo her chhuah chuan, Mission Veng Kohhrana mi thahnemngai ten Executive Secretary i/c Education, etc. Rev. B. Sangthanga an  lo titipui a. Anin bawhzui vat tula hriain, ama remruatnain hma lak tan leh a ni ta a.

Thawh 1-na:
CM hmuh tumin Rev. B. Sangthanga leh Pu Lalvena Hnamte te an kal a. Mahse, CM an hmuh mai theih loh avangin an lehkha ken chu PA hnenah an hnutchhiah.

Thawh 2-na:
Rev. B. Sangthanga, Upa Dr. L.N. Tluanga, Upa Rinzawna leh Pu Lalvena Hnamte te’n School Education Minister Pu H. Rohluna Chamber-ah Minister leh Commissioner & Secretary Pi Esther Lalruatkimi an va hmu a. Hmasawnna eng eng emaw a lo awm tawh thu an va hria a, an lawm haw hle.

Thawh 3-na:
Upa Rinzawna leh Pu Lalvena Hnamte, Secretary, SEB chu Director of School Education hnenah an va leng leh a. Beiseina sang tak neiin an haw leh a ni.

2018 kum tawp lamah Sawrkarna chelhtu Party an inthlak a, Sikulpui la let tura kan dilna chu bawhzui zel a ni a. May 29, 2019-ah chuan Cabinet Meeting thurel angin, Pu Lalchhandama Ralte, Minister i/c School Education Chamber-ah Mizoram Sawrkar aiawh Pi Esther Lalruatkimi, Commisioner & Secretary, School Education leh Synod aiawh Rev. K. Lalrinmawia ten Sikulsen leh Sikulpui inhlanna thuthlung an ziak a. Minister zahawm tak pawhin hriatpuina hming a ziak ve bawk. Inhlanna lehkhaah chuan point 5 tawi fel leh fun kim tak si a chuang (Memo D.11014/5/2017-EDN) Chung zinga langsar pakhat chu, 2019-2020 Session kal mekah chuan Sawrkarin a enkawl zui ang a, 2020 - 2021 Session atang chuan Mizoram Synod-in a enkawl tawh ang, tih a chuang.

Synod 2019, General 33-na thu angin SEC chuan Sikulpui enkawl dan tur ruahman turin Officers Meeting (OM) a ruat a, OM chuan kaihhruaina tlangpui siamin, School hawn dan tur leh enkawlzui dan tur chu Synod Education Board-in ruahman rawh se, tiin a rel ve leh a. Synod Education Board chuan thil tul apiangte bawhzuiin hma a la ta a. Mizoram Sawrkar (School Education Department)-in May 22, 2020-ah Sikulpui building, bungrua leh chabite Mizoram Synod kutah a hlan ta a, he hlanna inkhawm urhsun takah hian Rev. R. Lalchangliana, Moderator-in Mizoram Synod aiawhin chabi leh bungrua (dead stock) list nen a dawng a ni.

Synod chuan a theih ang tawka chakin hma a la zui a, Covid-19 hripui lêng avang erawh chuan hna a kal chak thei lo hle. SEB remruatnain admission-te hawn tan a ni a, mahse ni 6 emaw lek hnuah Total Lockdown a ni zui a. Zirlai 36 emaw chauh admit hman a ni.

Synod Service Board-in Headmaster atan Upa Zonunmawia, Mission Veng chu Session hnih atan tlawmngai turin a sawm a, Office Asst. pakhat leh IV  Grade 2 a la bawk a. Chumi hnuah Zirtirtu tur mi 12 a la leh a. Thawktu 16 an lo awm ta a ni. SEB chuan Sikulpui Sub Committee dinin, Executive Secretary i/c Education, etc. chu Chairman niin, Headmaster chu Secretary a ni a. SEB  member 4-te Committee member atan a ruat bawk. He Sub-Committee ngenna angin SEB (BEC) chuan October 16, 2020-a Sikulpui hawn hi a lo rel ta a ni.

Sawrkar chuan Sikulsen hi Boys’ Primary School, Sikulpui hi Boys’ Middle School a vuah a. Synod Education Board chuan hetia Synod kuta a lo let leh takah chuan a hming hmasa pahnih zinga pakhat, tun thlenga landmark pawimawh tak ni ta, Sikulpui hi hman zui ni se  tiin a  rel a. SIKULPUI tih a  ni  leh ta a ni.

SIKULPUI SUB COMMITTEE 2020 -2021

1. Rev. K. Lalrinmawia, Chairman
2. Upa Zonunmawia, Secretary
3. Upa Dr. C. Zarzoliana
4. Pu Lalvena Hnamte
5. Pu Lalremchhunga Pachuau
6. Nl. Zaithanchhungi

ZIRTIRTUTE:

1. Zosangliani, M.Sc. (Zoo), D.El.Ed d/o Sangzami, Tlangnuam West, Aizawl
2. Imanuel Lalchansanga, MA (Hist), D.El.Ed s/o J. Ruatkima, Thingsulthliah
3. Lalngaihawmi Varte, B.Sc. (Maths), MA (Socio), D.El.Ed, MTET, CCC d/o Lalduhlaia (L), Khatla East, Aizawl
4. Lalduhawmi Chawngthu, BA (Edn), D.El.Ed, MTET, CTET d/o C. Vanlalmawia, Ramhlun South, Aizawl
5. H. Lalramdinsanga, BA (Eng), D.El.Ed, MTET, CCA, CCC s/o H. Lalhmingmawia (L), Chaltlang, Aizawl
6. Lalramhlunpuii, BA (Edn), D.El.Ed, MTET d/o R. Biakchungnunga (L), Mission Veng, Aizawl
7. Lalmuanpuii, BA, D.El.Ed d/o R. Lalchangliana, ITI Veng, Aizawl
8. K. Joela, BA (Geog), D.El.Ed, MTET s/o K. Lalrinsiama, Upper Khatla, Aizawl
9. Benjamin Lalramngaihawma, M.Sc., D.El.Ed s/o Thangkima Pautu, Lungdai Chhim Veng
10. R. Lalhmangaihi, B.Sc (Zoo), MA (Pol Sc), D.El.Ed, CCA,CCC d/o Lalthlamuana, Durtlang Leitan, Aizawl
11. Lalremsangi Chawngthu, BA (Eng), D.El.Ed d/o Lalruatkima (L), Bungkawn, Aizawl
12. Mary Lalengpari, B.Tech (IT), D.El.Ed, MTET d/o Lalbiaknunga, Luangmual, Aizawl

THAWKTU DANGTE:

1. Vanlalhruaia, BA (Pol Sc), CCC (Office Assistant) s/o H, Vanparlawma, North Vanlaiphai
2. K. Malsawmkima, HSSLC (Peon) s/o K. Lalthlamuana, Mission Veng, Aizawl
3. R. Vanlalhruaia, HSSLC (Chowkidar) s/o R. Vanchhunga (L), Hunthar Veng, Aizawl