Vawiin (Oct. 21, 2020) khan Sunday School Committee vawi 164-na, J.M. Lloyd Hall, Synod Office-ah an thu a, meeting hi Synod Moderator Rev. R. Lalchangliana’n a kaihruai a, Secretary report ngaihthlak a ni bawk.
Secretary report-a tarlan danin kumin hian Covid-19 (hripui) leng avangin zin chhuah tam theih a ni lova. Hri len hma khan Bial leh Kohhran hrang hrangah vawi 16 an feh chhuak a ni. Kumin chhungin lehkhabu - Sunday School Zirlai bu hrang hrang leh a dangte nen bu 17 lai tihchhuah a ni. Kumin chhung hian Sunday School hotute, zirtirtute leh zirlai zawng zawng belh khawm hi mi 4,42,365 an ni a, Sunday School chawimawina chi hrang hrang siam tan kum 1967 atanga kumin (2020) thlenga chawimawina dawng tawh zawng zawng hi mi 53,644 lai an tling tawh bawk. Nikum (2019) khan MSSU Pathian thu exam 1,00,172 an awm a, lawmman dawng (honours) zat 55,570 an awm. Kumin hian Khawvel Sunday School Ni-ah Puitling lamin Bible - Pathian thu nung, Upa C. Thangnghilhlova ziak zir ho tur a ni ang a, Inter. - Senior department-in Pi Malsawmi Chanchin, Pi Lalrinkimi ziak an zir ang a, Beginner - Junior lamah Kristian Naupang awm dan mawi, Upa K. Zoremsanga ziak zirho a ni ang.
Tun tum meeting-ah hian agenda atanga thu langsar zual zingah Sunday School-a rual ban lo enkawl dan kaihhruaina chungchang te, kum 2020 Sunday School kai kim chhiar dan tur chungchang te, MSSU logo hman dan chungchang te, kum 2021-2022 Budget estimate te an thlirho a ni.